Бүлүү улууһун Өкүндүтүттэн төрүттээх Дмитрий Винокуров 2022 сыллаахха Владивосток куоракка ыытыллыбыт “Азия оҕолоро” VII оонньууларыгар хапсаҕайга 62 киилэ ыйааһыҥҥа чемпион үрдүк аатын сүкпүтэ.
Кини сүүмэрдиир күрэхтэһиигэ үһүс миэстэни ылбыта эрээри, “Азия оҕолоро” оонньууларга кыттар быраабы ылар хапсыһыыларга бастаабыта уонна аан дойдутааҕы турнирга барбыта. Дмитрий Винокуров “Азия оҕолоро” көбүөрүгэр Приморье уонна Тува тустууктарын эрэллээхтик кыайталаан улахан ситиһиилэммитэ.
Кини билигин улахан дьоҥҥо тустар, сымсатынан, түргэн туттуутунан, кылбар быраҕыыларынан биллэр тустуук буолар. Айылҕаттан бэриллиилээх Дима Винокуровы кыра эрдэҕиттэн тустуу кистэлэҥнэригэр төрөппүт аҕата, тустуу тириэньэрэ Дмитрий Винокуров үөрэппитэ-такайбыта. Сотору кэминэн кини аатын улахан көбүөрдэргэ истиэхпит диэн эрэниэххэ.
— “Азия оҕолоро” VIII аан дойдутааҕы оонньууларга кыттар Саха сирин хамаандаларын, Бүлүү улууһуттан 6 көрүҥҥэ кыттар 9 эдэр спортсменнарга ситиһиилэри, чаҕылхай кыайыылары баҕарабын! – диир “Азия оҕолоро” VII аан дойдутааҕы оонньууларын хапсаҕайга чемпиона Дмитрий Винокуров.
Даҕатан эттэххэ, быйылгы “Азия оҕолоро” VIII аан дойдутааҕы оонньууларга хапсаҕайга Бүлүү улууһун Лөкөчөөнүттэн төрүттээх, билигин Мукучуга хапсаҕай киинигэр эрчиллэр, Саха сирин чемпиона Марк Антонов тустар.
Фотоҕа: Дмитрий Винокуров аҕатын, тустуу тириэньэрин Дмитрий Владимировичтыын күрэхтэһии көрө сылдьаллар.
Николай Куприянов.