Бүлүү куоратын сыбаалкатын оҥорон баран дьаһайбаттара, бары Мииринэй бас билэр дииллэрэ олох өйдөммөт дьаһал тахсыбыт, ол мииринэйдэр манна кэлэн дьаһайаллар үһү дуо? Үлэһиттэрэ да аҕыйахтар эбит, харчы хомуйарга эрэ олороллор быһыылаах, хас массыына, ким куппутун суруйан иһэллэр эбит.
Ол курдук улахан айдаарыы кэнниттэн тутуллубут профлиис олбуордара умайан сыппыта икки сыл буолла, хата, онон массыыналар быһалыы бөхтөрүн кутар буолтара, тыал курдары бөҕү-сыыһы барытын суол диэки ыспыта, наһаа ынырык хартыына буолта. Саатар былырыын кууллаан хомуйан баран, ити уон хаамыылаах сиргэ илдьибэтэхтэрин ыттар барытын ыһан кээспиттэрэ оннук сытаахтаабыта. Хаһыаттаһан да, кэпсэтэн көрбүппүт да туһа тахсыбатаҕа, хата, хаар барахсан түһэн абыраабыта.
Быйыл саас эмиэ хаар ууллан ити бөхпүт тахсан кэлбитигэр үөһээ тэрилтэлэргэ эрийэ сатаабыппыт, дьаһалта сурук ыыталаабыта. Онуоха Мииринэйгэ сурук ыыттыбыт диэн эппиэт кэлбитэ. Ол иһин ыксаан Роспотребнадзор Бүлүү улууһунаҕы территориальнай органын кылаабынай исписэлииһигэр Афанасий Михайлович Николаевка эрийбитим.
Хата, кини тутатына сыбаалка үлэһиттэрин көрсөн акт оҥорон, хаста да болдьох, сэрэтии биэрэн, бөх анныттан профлиистэрин хостоон туруордулар, суол бөҕүн-сыыһын ыраастаатылар.
Тыал ыспыт салапааннарын утары хомуйан иһэллэрэ буоллар бэрт буолуо этэ, ити салапааннар аллараа күөллэргэ түһэн, ууну киртитэн, эбэҕэ тиийэ баран эрдэхтэрэ.
Бу үлэни толорторорго информациянан күүс-көмө буолбут дьоннорбор махтанан туран, салгыы ааттарын суруйабын. Егоров Трофим Петрович, бастакы 2010 сылтан бу сыбаалканы утарааччы фотокорреспондент, Веревкина Светлана Анатольевна суолга туох уларыйыы тахсыбытын сиһилии кэпсиир, тулалыыр эйгэни харыстааһыҥҥа дууһалыын ыалдьар киһи. Николаева Анастасия Константиновна сыыһаны-халтыны көрдө-иһиттэ да утары киирсэр, патриоппут Андреева Евдокия Михайловна элбэх хаартысканы түһэрэн ыыппыта, өссө Чочу урукку аартыгар иккис сыбаалка баарын булан ыыппытын ыйыталаспыппыт. Ону мэрия ыраастыы сылдьабыт диэн эппиэттээбитэ.
Сылдьар суолбут аартыгын сүүрэн-көтөн ыраастаппытын иһин Чочу олохтоохторун барыларын ааттарыттан Роспотребнадзор ТО кылаабынай исписэлииһигэр Николаев Афанасий Михайловичка улахан махталбытын тиэрдэбит. Дьон туһугар туруулаһар үлэҕэр өссө үрдүк ситиһиилэри, тус олоххор этэҥҥэ буолууну баҕарабыт.
Кини көмөлөспөтөҕө буоллар, сыбаалка бөҕө хаһааҥҥа диэри хомуллубакка сытыа эбитэ буолла. Ол суут уурааҕын толоруу, бука, ыарахан буолуо этэ, тустаах сыбаалка үлэһиттэригэр диэн этэбин, ол мииринэйдэр ыраастаабатаххыт диэн үлэһиттэри буруйдуо этилэр.
Сыбаалка территориятын ыраастаабыттара, көрүөххэ наһаа үчүгэй, итини Бүлүү куорат волонтердара хомуйбуттар эбит. Айаннаан ааһан истэххэ, киһи санаата үөрэр, айылҕабыт киртэн ыраастаммыта наһаа үчүгэй, тыал ыспытын ыраастаабыт волонтердарга барҕа махтал.
Быйылгы кыһыны аартыкпыт ыраас көрсөр буолла диэн уонна икки сылы быһа хаар баттаан сыппыт бөҕө ыраастанан үчүгэй буолбутуттан Чочу олохтоохторо үөрэбит. Бука бары айаммыт аартыгын ыраастык тутуоҕуҥ, киртитии түбэлтэтин көрдөххүтүнэ ватсаабынан тарҕатан иһиҥ диэн этиэхпин баҕарабын. Тулалыыр эйгэбитин харыстыаҕыҥ, куруук ыраас, чөл чэлгийэ турдун.
Федора Николаева,
“Экология тиэргэнтэн саҕаланар” түмсүү салайааччыта.