Олунньу ый бүтүүтэ Октябрь Лукин баһылыктаах Үгүлээт нэһилиэгэр «Хаарбах уонна саахалланар туруктаах дьиэттэн көһөрүү» бырагырааманан 7 квартиралаах таас дьиэ үлэҕэ киирэрэ күүтүллэр.
Улуус дьаһалтатын ааспыт сыллааҕы үлэтин отчуотун туруорар улуус баһылыгын бастакы солбуйааччы Иван Евсеев салайааччылаах иккис бөлөх тохсунньу 21 күнүгэр Үгүлээт нэһилиэгин олохтоохторун кытта көрсүһүүтүгэр саҥа дьиэ туһунан кэпсэтии эмиэ тахсыбыта.
Улуустааҕы тутуу управлениетын салайааччы Макар Маисов, бырамыысаланнас управлениетын салайааччытын солбуйааччы Николай Саввинов, отчуоттуур бөлөх кыттыылаахтара саҥа дьиэҕэ сылдьан тутуу хаамыытын билистилэр, тутааччылары кытта кэпсэттилэр.
…Дьиэни туппут «Аурис» ХЭУо дьиэ ис өттүнээҕи үлэтин түмүктээн эрэрэ көстөр. Хас биирдии квартираҕа гаас оһох туруоруллубут. Макар Маисов билиһиннэрбитинэн, оҕо уһуйаанын таас дьиэтин тутан уопутурбут олохтоох уолаттар монолит дьиэни бэйэлэрэ тутан таһаарбыттар. Билигин дьиэҕэ киирэр кирилиэс оҥоруута, кырааска-испиэскэ үлэтэ хаалбыт.
Ити курдук, быйыл олунньу ыйга улуус ыраах хоту уһугар сытар Үгүлээт нэһилиэгэр аан бастаан элбэх квартиралаах таас дьиэ үлэҕэ киириэхтээх. Элбэх квартиралаах дьиэ ыраах сытар бөһүөлэккэ иккис улахан таас тутуунан буолар.
Уопсайынан, Бүлүү улууһугар «Хаарбах уонна саахалланар туруктаах дьиэттэн көһөрүү» бырагырааманан сылын аайы үөһүнэн-тыанан элбэх дьиэ тутуллан үлэҕэ киирэр, дьон олорор усулуобуйатын тупсаран толору хааччыллыылаах квартираларга үөрэ-көтө көһөллөр.
Николай Куприянов.