Тыа хаһаайыстыбатын миниистирэ Артем Александров салайааччылаах Саха Өрөспүүбүлүкэтин ситэриилээх былааһын 2023 сыллааҕы үлэтин түмүктэрин билиһиннэрэр бөлөх бастакы күн Бүлүү улууһун соҕуруу уһугар Лөкөчөөҥҥө уонна Илбэҥэҕэ сылдьан баран, сарсыҥҥы күнүгэр улуус хоту уһугар сытар Үгүлээккэ уонна I Күүлэккэ отчуоту туруорда.
Тыа хаһаайыстыбатын миниистирэ Артем Александров, Тырааныспар уонна суол хаһаайыстыбатын министиэристибэтин суол сулууспатын салайааччытын солбуйааччы Андрей Иванов, СӨ Судаарыстыбаннай сакаасчыт сулууспата «Мин Сахам сирэ XXI үйэҕэ» ГКУ отделын начаалынньыга Алексей Петров, депутаттар оройуоннааҕы Сэбиэттэрин бэрэссэдээтэлэ Гаврил Корякин, управлениелар салайааччылара састааптаах бөлөх I Күүлэт уонна Үгүлээт нэһилиэктэрин дьонун-сэргэтин кытта көрүстэ.
Улуус дьаһалтатын, өрөспүүбүлүкэ ситэриилээх былааһын отчуоттарыгар Ил Түмэн депутата, оройуоннааҕы балыыһа кылаабынай бырааһа Егор Григорьев кытынна, элбэх быһаарыы биэрдэ. Ил Түмэн депутата отчуоттарга кыттыытын сонун көстүү быһыытынан бэлиэтиэххэ сөп.
I Күүлэккэ миниистир Артем Александров бастатан туран улууска биир бөдөҥ уонна бастыҥ үлэлээх «I Күүлэт» кэпэрэтииби билистэ, хотоннорго сырытта, эбийиэктэри көрдө-иһиттэ. Итини сэргэ, сотору кэминэн үлэҕэ киириэхтээх 150 миэстэлээх оскуолаҕа түмүк үлэлэри билистэ.
Бүлүү улууһугар өрүс уҥуор тирэх нэһилиэгинэн быһаарыллыбыт I Күүлэккэ отчуоту истэ-дьүүллэһэ 60 тахса киһи сырытта. Артем Александров өрөспүүбүлүкэ ситэриилээх былааһа ааспыт сылга ыыппыт үлэтин сиһилии, тыа хаһаайыстыбатын сайдыытыгар инники былааннары билиһиннэрдэ.
Кэпсэтии сүнньэ тыа хаһаайыстыбатын сайыннарыы тула барда. Мунньахха кыттыбыт I Күүлэт олохтоохторо урут тыа сирин олохтоохторугар аналлаах кэтэх дьиэни туттууга бырагыраама тоҕо үлэлээбэт буолбутун туоһуластылар, тыа сирин киһитигэр болҕомто уурулларын, өртөөһүнү ыытыыны көҥүллүүрү, элбэх оҕолоох эдэр ыалларга дьиэ тутуутугар көмөнү уо.д.а. туруорустулар.
Бары ыйытыктарга отчуоттуур бөлөх кыттыылаахтара толору хоруйдары биэрдилэр. Социальнай көмүскэл управлениетын салайааччы Алина Каратаева элбэх оҕолоохторго чэпэчэтиилэри быһааран биэриитин дьон сэргээтэ.
«I Күүлэт» кэпэрэтиип салайааччыта Елена Тутукарова кэпэрэтиип иккис хотонун туттарарга, өрөспүүбүлүкэ бүддьүөтүн үбүн 15 % тиийэ тыа хаһаайыстыбатын сайдыытыгар көрөргө, ууну түһэрэр систиэмэҕэ шлюз-регулятор тутуутун, кэпэрэтиип ууга барбыт Чачаҥда сайылыгын уутун түһэриини, тыа сирин сүрүн үлэһит дьоно — сылгыһыттар, ыаньыксыттар, механизатордар 15 сыл үлэлээтэхтэринэ биэнсийэҕэ тахсалларын ситиһэри туруорсуута отчуот кыттыылаахтарын өйөбүлүн ылла.
Ил Түмэн депутата, оройуоннааҕы киин балыыһа кылаабынай бырааһа Егор Григорьев балыыһа тутуутун туһунан кэпсэттэ, сотору кэминэн нэһилиэк баһылыгын Айал Новиковы кытта үөрэҕи бүтэрээри сылдьар эмчит-студеннары кытта көрсүөхтээхтэрин, тыа сиригэр кэлэн үлэлииллэригэр дуогабар түһэрсиэхтээхтэрин билиһиннэрдэ.
Үгүлээккэ миниистир кыттыылаах балык ыыһыыр сыах үөрүүлээх арыллыыта тэрилиннэ, Артем Александров икки сыллааҕыта саха ынаҕын иитэргэ анаан тутуллубут хотоҥҥо сырытта, көрдө-иһиттэ. Нэһилиэк баһылыга Октябрь Лукин сотору кэминэн саха ынаҕын аҕаларга кэпсэтии барбытын чуолкайдаата.
Мунньахха олохтоохтор улуус киинигэр диэри сайыннары сылдьарга Күүлэт уонна Сээт үрэхтэригэр понтон муосталары туруорары, ууну түһэрии үлэтин тэтимирдэри, саҥа кулуубу, оскуоланы, эдэр испэсэлиистэргэ олорор дьиэни тутууну уо.д.а.туруорустулар.
Байрон Иванов ынах төбөтүгэр субсидия көрүллүөҕүттэнүрүҥ ас аҕыйаабытын, саха ынаҕын аҕалыыга көмө үбүлээһин көрүллэригэр, ууга барыыга улахан көмөнү оҥорбут эргэ экскаваторга саппаас чааһа тиийбэккэ турарын кэпсэттэ.
Өрөспүүбүлүкэтээҕи мелиорация управлениетын салайааччы, биир дойдулаахпыт Дмитрий Махаров тэрилтэ бастатан судаарыстыба сорудаҕын толорорго үлэлиирин, онтон биирдэ атын үлэҕэ бэдэрээттэһэллэрин, саппаас чаас кэлэрин билиһиннэрдэ.
Миниистир Артем Александров олохтоохтор туруорсар боппуруостарын боротокуолга киллэриэхпит, төһө быһаарыллар кыахтааҕын биллэриэхпит диэн мунньаҕы түмүктээтэ.
I Күүлэккэ уонна Үгүлээккэ отчуокка элбэх дьон сылдьан санааларын этиммиттэрин, сэргэх кэпсэтии тахсыбытын бэлиэтиэххэ сөп.
Николай Куприянов.