Бүлүү улууһугар уһук сытар, үгүс үтүө үгэстэрдээх Үгүлээккэ уонна күүтүүлээх бастакы Күүлэт нэһилиэгэр СӨ үөрэҕириитин уонна култууратын туйгуна, сыана бэтэрээнэ, элбэх ырыа күрэхтэрин кыайыылааҕа, лауреата, бүлүүлэр киэн туттар көмүс куоластаах ырыаһыппыт Матрена Петровна Сивцева өрөгөйдээх үбүлүөйүгэр анаан уонна ийэтин төрөөбүт 100 сылын бэлиэтиир «Ийэ – иэйэр кут ымыыта» диэн программанан ахтылҕаннаах дойдутугар, ырыа дьоро киэһээтин бэлэхтээтэ.
Кинини кытта ырыа, музыка куттаах, байаан тутуурдаах чугас доҕотторо СӨ култууратын үтүөлээх үлэһиттэрэ: Николай Дмитриевич Стручков, Иван Иванович Туласынов, СӨ култууратын туйгуна Елена Николаевна Туласынова, төрөппүт уола Айсен Дмитриевич уонна Матрена Петровна иитиллээччитэ, инникигэ кэскиллээх Алик Алексеев кыттыылаах, бэйэтэ туспа тыыннаах байаанынан кэнсиэр “Сайдам” диэн саҥалыы тутуулаах сырдык, сылаас култуура киинигэр дьон биһирэбилин ылан, дохсун ытыс тыаһынан доҕуһуоллатан ситиһиилээхтик буолан ааста. Кэнсиэртэн киирбит үп СВО-ҕа ананна.
Бу кэнсиэркэ икки байаан көмүс дорҕооннорунан доҕуһуоллатан, бииртэн-биир араас кэмнээҕи сахалыы сайаҕас ырыалар ылланнылар, аныгы сиэринэн, фонограмманан да дорҕоонноох ырыалар дьиэрэйэ көттүлэр. Ол курдук Матрена Петровна бу истиҥ кэнсиэрин оҕо сааһа ааспыт ахтылҕаннаах дойдутугар, дьонугар-сэргэтигэр анаан «Саныыбын төрөөбүт алааспын» диэн ырыанан саҕалаата. Кини олус истиҥник, долгутуулаахтык дойдутун, дьоннорун үтүө-кэрэ үгэстэрин, оҕо сааһын ахтан-санаан сатабыллаахтык кэпсии-кэпсии ийэҕэ, аҕаҕа, оҕоҕо, тапталга анаммыт ырыалары толордо. Дьиэ кэргэҥҥэ ырыа утума быстыбат ситимин бигэргэтэн, төрөппүт уола Айсен Сивцев бэйэтин ырыаҕа дьоҕурун көрдөрөн, биир дойдулаахтарын биһирэбиллэрин ылла. Иитиллээччи Алик Алексеев сыанаттан доргуччу чуор, ыраас куолаһынан дуораһыта ыллаабытын көрөөччүлэр хабыллар ытыс тыаһынан көрүстүлэр. Маны таһынан ырыанан бииргэ алтыһар доҕотторо Елена, Иван Туласыновтар бииртэн биир үтүө-кэрэ мелодиялаах ырыалары сыыйа тартылар.
Матрена Петровна айылҕаттан бэриллибит кэрэ куоластаах, сырдык эйгэҕэ ис сүрэҕиттэн бэриниилээх, дьоҕурдаах Далбар Хотун буолар. Кини Герой Н.С.Степанов аатынан Бүлүүтээҕи 3 № дээх оскуолаҕа учууталлыырын таһынан, Бүлүү улууһун айар талааннаахтарын, улуус музыкальнай историятын кэпсиир экспонаттары, матырыйааллары мунньан, музыкаҕа анаммыт музей-лабораторияны үлэлэтэр.
Түгэнинэн туһанан, Үгүлээт нэһилиэгин дьаһалтатыгар, кэлэ-бара сырыыбытын транспорынан көмөлөспүтүгэр, чуолаан баһылык Октябрь Иванович Лукиҥҥа, кини солбуйааччытыгар Виктор Витальевич Федоровка, кулууп дириэктэригэр Яковлева Саргылаана Егоровнаҕа, уус-уран салайааччыга Алексеева Дьулустаана Реворьевнаҕа, Гаврильев Геннадий Петровичка, Васильева Розалия Львоваҕа, Иванова Мария Михайловнаҕа олус сылаастык, остуол тардан көрсүбүттэригэр уонна сымнаҕас айаннаах суоппарбытыгар Семенов Виталий Анатольевичка улахан махталбытын тиэрдэбит.
Елена Туласынова,
СӨ култууратын туйгуна.