Үгүлээт нэһилиэгин баһылыга Октябрь Лукин көҕүлээһининэн сааскы каникул кэмигэр 10 оҕо уонна 2 салайааччы буолан дойдубут киинигэр Москва куоракка сырыттыбыт.
Бу 10 оҕоҕо И.В.Яковлев аатынан орто оскуола туйгун үөрэнээччилэрэ уонна СВО кыттыылаахтарын оҕолоро киирдилэр. Айаммыт ороскуотун Үгүлээт дьаһалтата уйунна, улуус дьаһалтата олорор сирбит төлөбүрүгэр харчынан көмөлөстө. Үгүлээттэн Дьокуускайга диэри барыыбытыгар-кэлиибитигэр Үгүлээт дьаһалтата, балыыһа, улуус култууратын уонна үөрэхтээһинин тэрилтэлэрэ массыынанан көмөлөстүлэр.
Москваҕа икки күҥҥэ эрдэттэн программа оҥорон, Роскосмостар олус интэриэһинэй экскурсия тэрийдилэр. Бастакы күнүгэр космонавтар ханна, хайдах, туохха дьарыктаналларын барытын көрдөрөн кэпсээтилэр. Оҕолору тренажернай аппараттар истэригэр киллэрэн олордон да көрдүлэр. Нэһилиэкпитигэр саҥа оҕо сада арылларыгар кэлэ сылдьыбыт космонавт Олег Германович Артемьевы көрүстүбүт. Онтон космонавтика музейыгар сырытыннардылар уонна Юрий Гагарин паааматынньыгар сибэкки уурдубут. Иккис күнүгэр ВДНХ 34 павильоҥҥа олус улахан космонавтика моделларын көрдүбүт.
Онтон бэйэбит программабытынан Кыһыл Болуоссакка, Оружейнай палатаҕа, ВДНХ-ҕа, Москва Сити, «Островок мечты» сырыттыбыт. Бары дуоһуйа сынньанан, астынан кэллибит. Оҕолор элбэҕи биллилэр-көрдүлэр, бириэмэлэрин туһалаахтык атаардылар. Бу ыраах айаммытыгар, сырыыбытыгар көмөлөспүт тэрилтэлэрбитигэр барҕа махталбытын тиэрдэбит.
Надежда Спиридонова,
Үгүлээт.