Бүлүү улууһун тус хоту ыраах сытар Үгүлээт нэһилиэгэр ууга сытар оттуур ходуһалары ууттан босхолуурга олохтоох дьаһалта иһинэн тэриллибит «Хотугу Бүлүү» муниципальнай автономнай тэрилтэ бэйэтин экскаваторынан, бульдозерынан урукку хоруулары ыраастыыр.
Нэһилиэк таһымыгар суолталаах үлэ туһунан Үгүлээт нэһилиэгин баһылыга Октябрь Лукин биһиэхэ бу курдук билиһиннэрдэ:
— Былырыын атырдьах уонна балаҕан ыйдарыгар түспүт уһун ардахтар Үгүлээт нэһилиэгин Мээкиндэ, Уһун Эбэ уо.д.а. сүрүн оттуур ходуһаларын ууга ыыппыттара. Иллэрээ сыл биһиги эргин улахан ойуур баһаара туран, ойуурбут киэҥ сиринэн тайаан умайбыта. Онтон сылтаан ойуур сиһин уута киирэн сүрүн отуур ходуһаларбытын ылбыта, эбиитин быйылгы хаар, халаан уута саас эмиэ оттуур сирбитин уунан толорбута.
«Хотугу Бүлүү» муниципальнай автономнай тэрилтэ тэрийэн үлэлэппиппит ыраатта. Билигин тэрилтэ үлэһиттэрэ, олохтоох дьон: экскваторщик Иван Хачанов уонна бульдозерист Уйгулаан Иванов «Дьаархан» ууну түһэрэр систиэмэтин хорууларын ыраастыы, чөлүгэр түһэрэ сылдьаллар.
Бүгүҥҥү күҥҥэ 3 км хорууну ыраастаан 2 күөл уутун түһэрдилэр, салгыы 3 км хорууну ыраастаатахтарына 3 эбэ уута түһүөхтээх, оттуур ходуһа тахсыахтаах.
Муниципальнай тэрилтэ тэриммиппит, тиэхиньикэнэн хааччыммыппыт нэһилиэк элбэх кыһалҕаларын быһаарар диэххэ наада. Билиҥҥитэ ууну түһэрии үлэтин бэйэбит суоппутугар ыытабыт.
Николай Куприянов.