“Үйэлэр ситимнэрэ”

Олоҥхо декадатын чэрчитинэн өрөбүл күн Олоҥхо дьиэтигэр биир дойдулаахтарбыт, уос номоҕор сылдьар биллиилээх олоҥхоһут А.Д.Ксенофонтов-Аманааскы төрөөбүтэ 145 сылыгар уонна драматург, прозаик, РФ суруналыыстарын Сойууһун чилиэнэ Ф.А.Ксенофонтов-Докумуон төрөөбүтэ 90 сылыгар аналлаах “Үйэлэр ситимнэрэ” диэн оскуола оҕолоругар ортолоругар олоҥхону ааҕыы күрэһэ бэрт сэргэхтик, тэрээһиннээхтик барда.

Манна Бүлүү куоратыттан, нэһилиэктэр оскуолаларыттан уопсайа 40-ча оҕо саха баай төрүт тылынан олоҥхону араас куолаһынан бөлөҕүнэн уонна биирдиилээн тахсан истиҥник, өрө көтөҕүллүүлээхтик толордулар. Маны барытын  оройуоннааҕы оҕо библиотекатын  сэбиэдиссэйэ Владилена Софронова салайааччылаах 4 киһилээх дьүүллүүр сүбэ көрөн-истэн сыаналаата, түмүгү таһаарда.

Ааҕыы күрэһин ис хоһооно, тыла-өһө чуолкайа, сахалыы дьэрэкээн таҥаһа, толоруута, куолаһа чөллөркөйө барыта сыаналанна. Күрэс кэмигэр ааспыт сайын Өймөкөөн Томторугар ыытыллыбыт өрөспүүбүлүкэтээҕи Олоҥхо ыһыаҕар оһуокайга бары кыттыбыт Дархан этээччилэри баһыйа тутан, Бүлүү аатын киэҥ куйаарга сураҕырдыбыт “Кылаан  этээччи” диэн саамай үрдүк анал аатын ылбыт Каролина Петровна Харлампьева холобур курдук олоҥхоттон быһа тардан толорбутун оҕо-аймах олус биһирээн иһиттилэр, болҕомтоҕо ылан үөрдүлэр-көттүлэр.

Кыттыбыт оҕолор сүрүн оруолларын сааһылаан лоп-бааччы, бэркэ толордулар. Түмүккэ бөлөҕүнэн уонна биирдиилээн толорууга бастаабыт оҕолорго сыаналаах бириистэри, анал ааттары Тойон Сүбэ кыттыылаахтара В.В.Софронова, А.Д.Черкашина үөрүүлээх быһыыга-майгыга туттардылар. Ол курдук бөлөҕүнэн күрэскэ: I миэстэ “Сулусчаан” 6 оҕо Герой Н.С.Степанов аатынан оскуола 1 “б” кылааһа, салайааччылар А.П.Петрова, М.В.Сивцева; II миэстэ “Өбүгэ тыына” 11 оҕо салайааччы И.П.Докторова, Г.С.Донской аатынан 2 №-дээх орто осккуола; III миэстэ “Утум” 3 оҕо, салайааччы Е.С.Константинова, Хампатааҕы театральнай искусствотын оскуолата.

Биирдиилээн күрэскэ “Кылаан этээччи” үрдүк аатын Алан Мунхасытов (БППК) ылла, салайааччы М.А.Мунхасытова. Биһирэбил бириистэри уонна анал сертификаттары ыллылар: Айлина Горохова – 1 “г” кылаас, Бүлүүтээҕи алын сүһүөх оскуола, салайааччы А.Н.Игнатьева.

Айвар Прокопьев – 6 кылаас, Бүлүүтээҕи гимназия, салайааччы М.С.Алексеева, Мичийэ Иванова – Г.И.Чиряев аатынан 1 №-дээх оскуола, салайааччы С.П.Иванова, Карина Харлампьева – ВСОШ-3, салайааччы К.П.Харлампьева; Арылхан Семенов – 6 “а”кылаас, Г.С.Донской аатынан 2 №-дээх оскуола, салайааччы И.П.Докторова; Айынаат Адамов – Г.С.Донской аатынан оскуола, салайааччы И.П.Докторова.

Бу кэрэхсэбиллээх, бэрт интэриэһинэй, олус туһалаах тэрээһин сүрүн спонсорынан күндү ыалдьыттарбыт, олоҥхону, тойугу ытыктыыр, тус бэйэлэринэн сэмэй кылааттарын киллэрэр дьоһун дьоммут — Ф.А.Ксенофонтов-Докумуон улахан дьиэ кэргэттэрэ, аймахтара буоллулар. Кинилэр хас биирдии кыайыылаахха, кэскиллээх оҕолорго харчынан бириистэри, анал сертификаттары туттардылар.

Бу дьоһун тэрээһини иилээн-саҕалаан, кыайа-хото тутан ыытта В.О.Каратаев аатынан Олоҥхо норуодунай коллективын салайааччыта, СӨ култууратын туйгуна Светлана Тарасовна Иванова.

Николай Федоров.