Ахсынньы 20 күнүгэр Бүлүү к. ыччат библиотекатыгар Социалистическай Үлэ Геройа Прокопий Иннокентьевич Быканов төрөөбүтэ 85 сыллаах үбүлүөйүгэр анаан, «Саха Сирин киэн туттар дьоно» сериянан тахсыбыт кинигэ уонна «Суолдьут сулус» документальнай киинэ сүрэхтэниитэ буолла.
Улуус баһылыга Сергей Винокуров, куорат баһылыга Ян Попов, Халбаакы нэһилиэгин баһылыга Алексей Васильев, Халбаакытааҕы библиотека филиалын сүрүн бибилитиэкэрэ Надежда Семенова уонна да атыттар кыттыыны ыллылар.
Кинигэ уонна киинэ күн сирин көрөллөрүн туһугар үлэлэспит, кылааттарын киллэрбит дьоҥҥо Махтал суруктары туттардылар. Тэрээһин кэмигэр Прокопий Иннокентьевич олоҕун, дьоһуннаах үлэтин ахтан аастылар. Кини дойдутун, дьонун туһугар сыралаах үлэтин кэпсээтилэр.
Кинигэни билиһиннэрии кэнниттэн киинэ көрдөрдүлэр. Сүдү киһибит сырдык аатын үйэтитэргэ улахан үлэ бара турарын мустубут дьон астына бэлиэтээтилэр.
Василина Татаринова.