Ахсынньы 28 күнүгэр В.О. Каратаев аатынан Олоҥхо дьиэтигэр “Ыллык” түмсүү тэриллибитэ 10 сыллаах үбүлүөйэ үрдүк таһымнаахтык буолан ааста.
2014 сыллаахха алгысчыт, тойуксут, олоҥхо толорооччу, култуура туйгуна Владимир Спиридонович Николаев аҕам саастаах далбардары түмэн, 22 киһилээх “Ыллык” түмсүүнү тэрийбитэ. “Ыллык” түмсүү атын түмсүүлэртэн уратыта диэн Владимир Спиридонович алгысчыт буолан, түмсүүтүн далбардарын, уһуйаан, оскуола оҕолорун, эдэр ыччаты сахалыы сиэргэ-туомҥа, ырыаҕа-тойукка, оһуокайга, оһуокай үҥкүү төрүт хамсаныыларыгар, хомуска, алгыска үөрэтэр. Ону таһынан бары хоһоон суруйаллар, суруйбут хоһооннорун хомуйан, “Ымыылаах тылбыт ыллыга” диэн хомуурунньук таһаарбыттара.
Владимир Спиридонович “Алтан Дьааһын бухатыыр” олоҥхону, хас да араас үҥкүүнү түмсүүтүн далбардарыгар бэйэтэ үөрэтэн араас куонкурустарга кыттан, куруутун бириистээх миэстэҕэ тиксэллэр, олоҥхо декадатыгар аан маҥнайгыннан ыалларга сылдьан, олоҥхону толорууну саҕалаабыттара. Олоҥхо дьиэтигэр субуота аайы оһуокайы тэрийэн, “ Билии алгыһа”, “Оскуолаҕа киирии”, “Осуоланы бүтэрээччилэргэ”, “Уол оҕо алгыһа” диэни, ону таһынан уһуйааннарга, оскуолаларга сылдьан бэсиэдэлэри оҥороллор. Улууска, куоракка ыытыллар акцияларга, телемарафоннарга көхтөөхтүк кытталлар. Бүлүү улууһун уопсастыбаннай түмсүүлэрин 2018, 2023 сылы түмүктүүр тэрээһиннэригэр, “Сыл бастыҥ түмсүүтэ” буолбуттара.
“Ыллыктар” үбүлүөйдэрин 10 сылы быһа үлэлээн кэлбит Олоҥхолорун дьиэтигэр астына тэрийдилэр, уран тарбахтаах далбардар бэйэлэрэ оҥорбут оҥоһуктарын, тикпит таҥастарын аҕалан быыстапка туруорбуттар. Софронеева Аксинья Васильевна оҕуруонан быысыбайдаан оҥорбут хартыыналара, түөскэ, кулгаахха, төбөҕө кэтэр араас дьэрэкээн киэргэллэрэ, Софронова Марина Михайловна таҥас лоскуйуттан ковриктара, сахалыы тигиилээх уостаах оҕуруо тиһиилээх үтүлүктэрэ, кыбытыгынан тигиллибит харысхал бэлиэлээх ковриктара, аныгылыы тигиилээх кыра кыбытыктаах, оҕуруолаах сумочкалара киһи эрэ сөҕүөх курдук кэрэлэр, кэлбит дьоннор наһаа биһирээтилэр.
Үбүлүөйү “Ыллык” түмсүү салайааччытын солбуйааччы Клавдия Ивановна Софронеева иилээн-саҕалаан ыытта, “Хаһаайыска” түмсүү салайааччыта, Бүлүү куорат бочуоттаах олохтооҕо Светлана Павловна Калачикова тойугунан аста. Улуус дьаһалтатын социальнай уонна эдэр ыччат политикатын отделын салайааччыта Елена Николаевна Федорова 10 сыллаах үбүлүөйдэринэн улуус баһылыгын уонна тус бэйэтин аатыттан итиитик-истиҥник эҕэрдэлээтэ уонна улуус баһылыгын Бочуотунай грамотатын туттартаата, улуус уопсастыбаннай түмсүүлэрин салайааччыта Мария Петровна Томская, солбуйааччыта Елена Яковлевна Сивцева эҕэрдэлээн туран, сэмэй бэлэхтэрин туттардылар, М.Н. Жирков аатынан култуура Дыбарыаһын дириэктэрэ Алена Александровна Дашевская эҕэрдэлээн туран, Махтал суруктары, сэмэй бэлэхтэрин туттарда, В.О.Каратаев аатынан олоҥхоһуттар коллективтарын салайааччыта Светлана Тарасовна Иванова эҕэрдэлээтэ уонна “Бүлүү олоҥхото быстыбат ситим” диэн кинигэни бэлэх уунна, Сунтаартан “Ыллыктар” биир саамай актыбыыскалара Изаина Львовна үбүлүөйүнэн эҕэрдэлээн торт ыыппытын Клавдия Ивановна туттарда, бары төгүрүччү туран туорпутун Изаинаҕа махтанан туран сиэтибит.
Үҥкүү-битии саҕаланна, кэлэн иһэр Иэйэхсит уонна Моҕой сылын бэлиэтээн наһаа үчүгэй мааска тиктибиттэрин көрдөрдүлэр, салгыы остуол хотойорунан астаах бырааһынньык сандалытын тула олорон остуол оонньуулара саҕаланнылар, бириис бөҕө оонньонно, эҕэрдэ эриэккэһэ этилиннэ, ырыа-тойук да ылланна. Үбүлүөйдээх биэчэрбитин Светлана Павловна оһуокайынан түмүктээтибит.
Убаастабыллаах Владимир Спиридонович, “Ыллык” түмсүү ДАЛБАР ХОТУТТАРА!
Эһигини түмсүүгүт 10 сыллаах үбүлүөйүнэн Бүлүү улууһун уопсастыбаннай түмсүүлэрин уонна тус бэйэм ааппыттан итиитик-истиҥник эҕэрдэлиибин!
Инникитин даҕаны өссө таһаарыылаахтык үлэлээҥ, дьон-сэргэ үөрүүтүн үксэтэн, үрдүктэн-үрдүк ситиһиилэри дабайыҥ, тус олоххутугар доруобуйаны, дьолу, сырдыгы, ырааһы, үөрүүнү-көтүүнү, ис сүрэхпиттэн баҕарабын.
Мария Томская, Бүлүү улууһун уопсастыбаннай түмсүүлэрин салайааччыта, Бүлүү куорат бочуоттаах олохтооҕо.