Быйыл Бүлүүгэ ураты суолталаах, икки бүк үөрүүлээх дьоһун ыһыах тэрилиннэ. Ол курдук Ытык Бүлүү алгыстаах ыһыаҕа С.М.Аржаков төрөөбүтэ 125 сылыгар, Бүлүү куорат төрүттэммитэ 390 сылыгар ананна. Ыраахтан-чугастан мустубут дьон-сэргэХомустаах сиригэр-уотугар тоҕуорустулар. Саха Өрөспүүбүлүкэтин бырабыыталыстыбатын, Кытайтан бырааттыы куорат Хэган, “Роскосмос” судаарыстыбаннай корпорация бэрэстэбиитэллэрэ ытык-мааны ыалдьыт буоллулар.
Ыһыаҕы Бүлүү бреннэрэ –Тойон Бүлүү — Саха Өрөспүүбүлүкэтин култууратын үтүөлээх үлэһитэ Николай Ксенофонтов, Бүлүү Хотун — саха норуодунай артыыската Елена Сергеева-Румянцева,Таба Хотун — Саха Өрөспүүбүлүкэтин култууратын туйгуна
Жанна Ксенофонтова, Хомус Хотун — Саха Өрөспүүбүлүкэтин үтүөлээх артыыската Альбина Дегтярева, Сулус Уол – Афанасий Слепцов, Алмаас Кыыс — Саха Өрөспүүбүлүкэтин култууратын туйгуна Мария Михайлова арыйдылар.
Мантан салгыы Бүлүү улууһун 19 төрүт түөлбэлэрин, Кыһыл Сыыр бөһүөлэгин, Бүлүү куоратын айар-тутар ытык дьоно үбүлүөйдээх ыһыах Тойон түһүлгэтигэр киирдилэр.
Уохтаах кымыһынан Аал уоту күндүлээн, түптэ буруотун унаарытан, Алгыс аалын Алгысчыттар саха норуодунай артыыһа Герасим Васильев, Саха Өрөспүүбүлүкэтин култууратын туйгуна Мэҥкэр Сэмэн Хабырыыл Уола, Саха Өрөспүүбүлүкэтин култууратын туйгуна Владимир Николаев-Тоорукча көтөхтүлэр.
Бүлүү улууһун баһылыга Сергей Николаевич Винокуров, Улуус Ытык Киһитэ Афанасий Семенович Волков Дьөһөгөй Айыыга сүгүрүйэн кини маанылаах бэлэҕинэн – кымыһынан айах тутуу сиэрин-туомун толордулар.
2024 сылга Роман Дмитриев аатынан Аан дойдутааҕы турнир көҥүл тустууга чемпиона, көҥүл тустууга Арассыыйа спордун маастарыгар кандидат Роман Николаев Бүлүүбүт куоратын үбүлүөйдээх Ыһыаҕын Ытык Дуоҕатын өрө тутан киирдэ уонна улуус баһылыгар туттарда, Сергей Николаевич дохсун ытыс тыаһа доҕуһуолунан Ыһыах Ытык Дуоҕатын күөрэччи анньан дьоһун-дьоро туонаны арыйда.
Киин түһүлгэ сыанатыгар Ытык Бүлүү алгыстаах ыһыаҕын ытык-мааны ыалдьыттара: Саха Өрөспүүбүлүкэтин бырабыыталыстыбатын бэрэссэдээтэлин солбуйааччытаСтепанов Георгий Михайлович, Бүлүү улууһун баһылыга Винокуров Сергей Николаевич, Бүлүү куоратын баһылыга Попов Ян Анатольевич, «Роскосмос»корпорация судаарыстыбаннай былаас уорганнарын уонна регионнары кытта үлэлэһии киинин дириэктэрэ Халиулин Алексей Александрович, Кытай Народнай Өрөспүүбүлүкэтин Хэйлунцзян провинциятын Хэган куоратын норуотун бырабыыталыстыбатын баһылыга Ван Синчжу таҕыстылар.
Степанов Георгий Михайлович: «Бүлүү улууһа, Бүлүү куората эрчимнээхтик, киэҥ далааһыннаахтык сайда тураллар. Өрөспүүбүлүкэ Ил Дархана Айсен Сергеевич Николаев ытык-мааны Бүлүү дьонугар — ыһыах эһиэхэ сыллааҕы эрчими эптин, сэргэхситтин, өҥ дьыл буоллун, ис сүрэхпиттэн чэгиэн туругу, этэҥҥэ буолууну»- диэн үтүө баҕа санаатын тириэртэ, сахалыы чороону улуус аҕа баһылыгар туттарда.
«Бүлүү улууһа өрөспүүбүлүкэ бары улуустарын тэҥҥэ сайдыы суолугар эрэллээхтик үктэннэ.Улуус элбэх инники былааннаах, элбэх доҕоттордоох, ол биир туоһутунан «Роскосмос” корпорацияны кытта бигэ сибээс олохтонуута буолар. “Роскосмос” көмөтүнэн биһиги куораппытыгар саҥа 990 миэстэлээх оскуола тутуллар буолла диэн ыһыах күнүгэр бар дьоммор үөрүүлээх сонуну биллэриэхпин баҕарабын”, – диэн улуус баһылыга Сергей Винокуров иһитиннэрдэ.
Хэган куоратын норуотун бырабыыталыстыбатын баһылыга Ван Синчжу мөлүйүөн ахсааннаах Хэйлунцзян провинциятын дьонун-сэргэтин аатыттан Бүлүү дьонун үбүлүөйдээх ыһыаҕынан эҕэрдэлээтэ, Хэган куоратын уонна Бүлүү улууһун ыккардыгар бииргэ үлэлэһии туһунан сөбүлэҥ түһэрсибиппит, ол чэрчитинэн олох-дьаһах, экэниэмикэ эйгэтигэр икки өрүккэ туһалаах хамсааһыннар тахсалларыгар бигэ эрэллээҕин эттэ. Ван Синчжу Кытай талааннаах худуоһунньуктара уруһуйдаабыт улахан панноларын улуус олохтоохторугар бэлэх уунна.
“Роскосмос” корпорация бэрэстэбиитэлэ Алексей Александрович Халиулин “Роскосмос” уонна Бүлүү улууһа икки ардыларыгар өйдөһүү, өйөһүү сыһыаннарыгар тирэҕирэн, улуус, өрөспүүбүлүкэ, улуу дойдубут Арассыыйа сайдыытын туһугар инникитин да бииргэ үлэлэһэргэ чиҥ санаалаахтарын биллэрдэ.
Ытык Бүлүү Алгыстаах ыһыаҕа Бүлүү баай историятын ойуулуур, Бүлүү чулуу дьонун кытта билининнэрэр театрализованнай представлениенан түмүктэннэ.
Алгыстаах аартыгы арыйан,
Аан дойду үрдүнэн аатыран,
Үс саха үөрүүтүн үрдэтэн,
Үйэлээх кэскили кэҥэтэн,
Сайдар кэрэ Бүлүүгэ
Саргы-дьаалы салалыннын,
Саҥа аартык арылыннын!
Изольда Загитова.