Ханнык да бэйэлээх кэрэ, итии дойдуга тэҥнэспэт тапталлаах төрөөбүт дойдубут Иккис Күүлэт нэһилиэгэр «Дьүкээбил» сынньалаҥ киинин иһинэн «Сардаҥа» үҥкүү бөлөҕө айымньылаахтык үлэлиир. Үҥкүүнү доҕор оҥостубут, тыа сирин күннээҕи түбүгүн быыһыгар кэрэни кэрэхсиир, үлэ үөһүгэр сылдьар Күүлэкээммит үҥкүүһүт эдэркээн ийэлэрэ, далбар хотуттара дууһаны долгутар муусука тыаһыгар доҕуһуоллатан, көтө-дайа үҥкүүлээн бар дьоммутун үөрдэ-көтүтэ сылдьарбытыттан сахалыы сэмэйдик үөрэбит, киэн туттабыт.
Күн бүгүн «Сардаҥа» үҥкүү бөлөҕөр 19 кэрэ аҥар икки бөлөҕүнэн хайдыһан, нэһилиэкпит айымньылаахтык үлэлиир биир бастыҥ түмсүүтэ буолабыт. Салайааччыбыт — «Дьүкээбил» сынньалаҥ киин исписэлииһэ Алексеева Татьяна Христофоровна.
Үҥкүүбүт бөлөҕө 2022 сыллаахха балаҕан ыйын 29 күнүгэр төрүттэммитэ. Кэллэктиипкэ Күүлэкээммит нэһилиэгин сүрүн тэрилтэлэрин салайааччы кэрэ аҥардара, нэһилиэк тутаах дьоһун мааны далбар хотуттара. Ол курдук «Дьүкээбил» сынньалаҥ киинин дириэктэрэ Иванова Христина Дмитриевна, «Антошка» оҕо уһуйаанын сэбиэдиссэйэ Федорова Жанна Егоровна, «Аргыс» маҕаһыын сэбиэдиссэйэ Дмитриева Анна Валерьевна, 2 Күүлэт нэһилиэгин дьаһалтатын сүрүннүүр исписэлииһэ Десенко Ирина Николаевна, орто оскуола талааннаах учууталлара, култуура үлэһиттэрэ. Үҥкүүбүт бөлөҕүн саамай аҕа саастаах күн күбэй ийэтин, элбэх сиэн эйэҕэс эбээтин, сыана бэтэрээнин, араас бэстибээллэр кыайыылаахтарын, 71 саастаах, үҥкүү куттаах Софронова Мотрена Яковлевнаны киэн тутта ааттыыбыт.
Биһиги төрөөбүт дойдубут Бүлүү улууһун уһук хоту сытар нэһилиэктэриттэн биирдэстэрэ буолар. Баай хара тыаларыгар бултаах-алтаах, нэлэһийэр алаастарыгар сайынын кэрэчээн сибэккилэр тэтэрэллэр, дириҥ уулаах ыраас күөллэригэр минньигэс соболор көөчүктэнэ оонньууллар, алаас, сыһыы ходуһаларыгар ынах сүөһү, дьөһөгөй оҕото мэччийэр, күөх хонууларыгар оҕо-аймах оонньоон чаҕаарар. Бу маннык кэрэ дойдуга үҥкүү куттаах Далбар хотуттар олоробут, кэрэҕэ тардыһан, сири-дойдуну көрөн, араас бэстибээллэргэ кыттан кыайыы кынаттанан, төрөөбүт дойдубутун аар-саарга аатырдабыт. Киэн тутта ааттыыбыт бөлөхпүт ситиһиилэрин:
«Кыһын Саха сириттэн саҕаланар» диэн бэстибээл иһинэн ыытыллар Бүтүн Арассыыйатааҕы «Северная звезда» куонкуруска, аан дойдутааҕы «Бриллиантовые нотки» бэстибээлгэ, Арассыыйатааҕы «Стихия танца»күрэххэ, «Терпсихора» үҥкүү бэстибээлигэр, Арассыыйатааҕы «Триумфы России» диэн айар талааннар куонкурустарыгар, элбэх хайысхалаах «Таланты Великой России» диэн күрэххэ, аан дойдутааҕы «На вершине успеха» бэстибээлгэ кыттан кыайыы өрөгөйдөрүн билбиппит. Быйыл «Хотугу сулус» телевизионнай бэстибээлгэ ситиһиилээхтик кыттан, күөх экран нөҥүө көстөр чиэскэ тиксэн үөрүүбүт муҥура суох. Күүлэкээн нэһилиэгин «Сардаҥа» үҥкүү бөлөҕүн, тапталлаах дойдубут туһунан кэрэ кэпсээн кэпсээтибит, төрөөбүт дойдубутун киэҥ нэлэмэн Сахабыт сирин олохтоохторугар билиһиннэрдибит.
«Сардаҥа» үҥкүү бөлөҕүн кэллэктиибэ.
Христина Иванова хаартыскалара.