Устудьуоннарга аан дойду чөмпүйүөнэ, Европа чөмпүйэнээтин икки төгүллээх боруонса призера, 1 Күүлэт нэһилиэгин бочуоттаах олохтооҕо, норуоттар икки ардыларынааҕы кылаастаах успуорт маастара Эдуард Григорьев — кыайыы үрдүк чыпчаалларын дабайбыт, сахалары аар-саарга аатырдыбыт, өрөгөй үөрүүтүн биллэрбит күүстээх бөҕөстөртөн биирдэстэрэ. Былырыын Эдуард улахан успуортан барбытын туһунан биллэрбитэ. Бүлүү куоратыгар кинини атаарар тустуу улахан түһүлгэтэ тэриллибитэ.
Билигин ханна баарый? Тугунан дьарыктанарый? Инники туох былааннардааҕый? Бу уонна атын ыйытыылардаах кинини кытта кэпсэттибит.
Аартык арыллыыта
Эдуард 1995 сыллаахха алтынньы 20 күнүгэр төрөөбүтэ. «Бииргэ төрөөбүт үспүт, мин ортоку оҕобун. Убайдаахпын уонна бырааттаахпын. Оонньуур-көрүлүүр оҕо сааһым дойдубар, 1 Күүлэккэ, ааспыта. Бэһис кылааска диэри 1 Күүлэт орто оскуолатыгар үөрэммитим, онтон Чурапчыга успуорт оскуолата баарын истэммин, онно көһөн барбытым»,- диэн кэпсиир кини.
Улахан кыайыылары аҕалбыт, инники олоҕун түстээбит успуорт көрүҥэр — тустууга Эдуард бастакы кылааска үөрэнэ сылдьан кэлбитэ. Ол курдук: «Бастакы кылааска үөрэнэ сырыттахпына, оскуолабытыгар Роман Гаврильевич Окоемов диэн физкультура учуутала үлэлии кэлбитэ. Кини оҕолору бары хайысхаҕа эрчийэн саҕалаабытыгар, тустууну талан эрчиллэн бараммын сөбүлээн, утумнаахтык дьарыктанан барбытым»,- диэн бастакы хардыыларын ахтар. Удьуор утума быстыбатын курдук успуорка эмиэ утумнааһын диэн баар. Ол курдук Эдуард эһэтэ Иван Филиппович эмиэ тустуунан дьарыктана сылдьыбыт эбит.
Кыайыылар, чыпчааллар
2020 сыллаахха Эдуард гражданствотын Россияттан Польшаҕа уларыппыта. «Бу быһаарыныым профессиональнай карьерабар улахан саҕахтары арыйбыта, — диир кини. «Европа, Аан дойду чемпионаттарыгар кыттарбар Польшаттан кыттар чэпчэки этэ».
Кини саамай күндүтүк саныыр кыайыыта — бастакы улахан кыайыыта. «Саамай улахан, күндүтүк саныыр бастакы кыайыым 2018 сыллаахха Бразилия Гояна куоратыгар ыытыллыбыт устудьуоннарга аан дойду чемпионатыгар этэ», — диэн ахтар Эдуард.
Дойдутугар төннүү
Билигин Эдуард Чурапчыга олорор, нэһилиэк дьаһалтатыгар ыччат политикатын исписэлииһинэн үлэлиир. «Дойдубар, Бүлүүгэ, бу сыл сааһыгар диэри баар этим. Сотору эмиэ баран кэлиэм этэ»,- диир кини.
Күүс-уох хантан ыларын ыйытыыга Эдуард судургутук эппиэттээтэ: «Күүс-уох ылар сирим — дьарыгым буолар. Үчүгэйдик бэлэмнэннэххинэ, утумнаахтык дьарыктаннаххына, ситиһии кэлэр». Кырдьык даҕаны, улахан кыайыылар, успуорка ситиһиилэр дьаныардаах үлэттэн тахсаллар, үгүс сыраны-сылбаны эрэйэллэр.
Билиҥҥи тустуу туһунан
Эдуардтан тустуу билиҥҥи туругун, туохха ордук болҕомтону ууруохха наадатын ыйыттыбыт. «Тустуу сылын аайы сайда турар, эрчимнээх эдэр бөҕөстөр тахсан иһэллэр, — диир кини. — «Киһи уопсайа 6 мүнүүтэ тустар. Ол бириэмэ устата, мин санаабар, киириэҕиттэн тустан бүтүөр диэри сылайбакка, сэниэтин эспэккэ тустарын ситиһэри эрчиллиэххэ, болҕомто ууруохха наада».
Эдэр тустууктарга кини судургу, ол эрэн олус наадалаах сүбэни биэрэр: «Саамай сүрүнэ — туста сылдьан туран хаалбатыннар, туста сатаатыннар, туох эмит приемнары оҥоро сатаатыннар. Билиҥҥи тустуу оннук буолан турар».
Эдуард инникитин дьиэ-уот туттан, оннун булан, билигин үлэлии сылдьар сиригэр — Чурапчыга олохсуйар былааннаах.
Эдуард Григорьев — бэйэтин үлэтинэн, дьулуурунан, кыаҕынан үрдүк чыпчааллары дабайбыт спортсмен. Кини олоҕун кэрчиктэрин кэпсээн ааҕааччыларбытын кытта үллэстибитин иһин махтанабыт, биир дойдулаахпытыгар ситиһиилэри баҕарабыт. Бүлүүбүтүн ааттатар күүстээх бөҕөстөр өссө да тахса турдуннар!
Галина Долгунова.