Бүгүн Дьокуускайга Александр Крылов кэриэһигэр көҥүл тустууга Бүтүн Арассыйатааҕы, хапсаҕайга бырааттыы Ноговицыннар өрөспүүбүлүкэтээҕи турнирдара түмүктэннэ, кыайыылаахтар үрдүкү үктэллэргэ тахсан чиэстэннилэр.
Бүлүү тустууктара бу турнирдарга хайдах кыттыбыттарын туһунан Бүлүү улууһун хапсаҕайга хамаандатын тириэньэрэ, спорт маастара Дмитрий Акимов билиһиннэрдэ:
— Хапсаҕайга бырааттыы Ноговицыннар өрөспүүбүлүкэтээҕи турнирдарыгар 85 киилэ ыйааһыҥҥа маастар Ньургустаан Брощев чемпион үрдүк аатын ылла. Кини финалга Тааттаттан биллэр тустуугу Албан Аббакумовы кыайда.
Александр Крылов кэриэһигэр көҥүл тустууга Бүтүн Арассыйатааҕы турнирга 65 киилэҕэ Бүлүү тустуутун оскуолатын иитиллээчитэ Василий Григорьев бэрт ситиһиилээхтик тустан, үһүс бочуоттаах миэстэни ылары ситистэ.
Кини бастакы эргииргэ Эрэл Диодоровы 12:1, иккискэ- Арассыыйа призерун Виктор Яковлевы 7:2, үһүскэ —Николай Щегловы 4:0 кыайталаабыта. Финалга тахсар тустууга чемпион буолбут Чаян Монгушка бэрт кыранан,7:9 ахсаанынан кыайтарбыта.
Үһүс миэстэ иһин киирсиигэ биһиги уолбут Валерий Бурнашевы 7:1 ахсаанынан эрэллээхтик кыайан, Бүтүн Арассыыйатааҕы турнир боруонса мэтээлин ылары ситистэ.
Василий Григорьев тустуута эбиллэн иһэрэ көстөр, улахан турнир призера буолбутунан эҕэрдэлиибит, ситиһиилэри баҕарабыт!
Николай Куприянов.