Бүлүү улууһун хоту уһугар сытар, сиринэн айанныырга уустук суоллаах-иистээх Үгүлээккэ от ыйын 1 күнүгэр – Бойобуой дьайыылар бэтэрээннэрин күнүгэр анал байыаннай эпэрээссийэҕэ Кыайыы туһугар сырдык олохторун толук уурбут геройдар төрөөбүт, олорбут дьиэлэригэр мемориальнай дуоскалары ыйаатылар.
Байрон Иванов билиһиннэрбитинэн, Октябрь Лукин баһылыктаах «Үгүлээт нэһилиэгэ» тыа сирин түөлбэтэ Украинаҕа байыаннай дьайыыга Кыайыы туһугар сырдык олохторун толук уурбут биир дойдулаахтарын ааттарын үйэтитиигэ ситимнээх үлэни ыытар. Суолталаах үлэ биир дьоһун бэлиэтинэн билигин биһиги кэккэбитигэр суох геройдар дьиэлэригэр үйэ-саас тухары умнуллубат ааттарын үйэтиитиигэ мемориальнай дуоскалары туруоруу буолла.
— Украинаҕа буола турар байыаннай эпэрээссийэҕэ Үгүлээттэн барыта 5 буойун геройдуу охтубута. Бойобуой дьайыылар бэтэрээннэрин күнүгэр бастакынан Үгүлээккэ төрөөбүт Дмитрий Винокуров эһэлээх эбээтэ олорор дьиэлэригэр мемориальнай дуоска туруордубут. II Күүлэккэ сир испэсэлииһинэн үлэлии сылдьан байыаннай дьайыыга барбыт Василий Афанасьев уонна бастакы ыҥырыыга хабыллыбыт Иван Харлампьев төрөөбүт, олорбут дьиэлэригэр мемориальнай дуоскалары ыйаатыбыт, биир дойдулаахтарбытын ахтан-санаан аастыбыт, кинилэр геройдуу быһыыларын бэлиэтээтибит.
Байыаннай дьайыыга геройдуу охтубут икки бырааттыы Борисовтар Үгүлээттэн хоту эрдэ көһөн барбыттара. Үгүлээккэ олорбут дьиэлэрэ суох, аҕалара сэрии бэтэрээнэ, бойобуой офицер Георгий Борисов буолар.
Октябрь Лукин аны күһүн Үгүлээккэ байыаннай дьайыылар, Украинаҕа эпэрээссийэ кыттыылаахтарыгар анал искибиэр тутуохпут диэн кэнэҕэс былааннаах. Саҥа искибиэргэ бырааттыы Борисовтарга аналлаах өйдөбүнньүк бэлиэ туруохтаах, — диэн Байрон Иванов Бойобуой дьайыылар бэтэрээннэрин күнүн тэрээһиннэрин билиһиннэрдэ.
Ити курдук, ыраах Үгүлээккэ быйылгы Бойобуой дьайыылар бэтэрээннэрин күнүгэр Кыайыы туһугар олохторун толук уурбут хорсун буойуннар ааттарын, өйдөбүллэрин үйэтитиигэ сонун уонна дьоһун тэрээһин ыытылынна.
Николай Куприянов.