Олунньу 17 күнэ үүнэр түүнүгэр Үгүлээккэ «Үнүгэс» кэпэрэтиип хотоно умайыытыгар 56 саха ынаҕын сүөһүтэ, ол иһигэр, 22 ыанар ынах уокка былдьаммыттара.
Нэһилиэк баһылыга Октябрь Лукин билиһиннэрбитинэн, хотон умайан эрэрин туһунан чугас турар «Сахатранснефтегаз» базатын үлэһиттэрэ түүн 2 чааска тыллаабыттар. 10 мүнүүтэнэн уу баһар массыыналаах нэһилиэк баһаарынай хамаандата, олохтоохтор кэлэн уоту умулуннара сатаабыттар да, тыал «көмөлөһөн» 400 тахса кв м каркас, полистирол хотон биирдэ күдэпчилэнэн умайан, ынах сүөһүлэри кыайан өрүһүйбэтэхтэр…
Баһаарга «Үнүгэс» кэпэрэтиип, «Хотугу Бүлүү» муниципальнай тэрилтэ баайа-дуола уокка былдьаммыт.
Үгүлээттэр саха ынаҕын тутан сүөһү иитэр салааны сайыннарар санаалаах эрдэттэн күүскэ үлэлэспиттэрэ. 2019 сыллаахха «Үнүгэс» кэпэрэтиип «Саха ынаҕа» судаарыстыбаннай тэрилтэни кытта дуогабардаһан саха оҕустарын атыыласпыта. 2024 сыллаахха улуус дьаһалтатын өйөбүлүнэн 50 саха ынаҕын атыыласпыттара, каркас хотону нэһилиэк олохтоохторун күүһүнэн туппуттара.
Бүгүҥҥү күҥҥэ баһаар түмүгэр 8 мөл. солк тахса суумалаах хоромньу тахсыбыта бэлиэтэнэр. Баһаар туохтан тахсыбытын чуолкайдыыр силиэстийэ бара турар.
Тыа хаһаайыстыбатынан дьарыктанар «Үнүгэс» кэпэрэтиип үлэһиттэригэр, турунан туран дьарыктаммыт баһылык Октябрь Лукиҥҥа уустук кэмҥэ күүстээх, ырааҕы көрөр санааны, ынах сүөһүлэрин чөлүгэр түһэрэллэригэр баҕарыаххайыҥ!
Николай Куприянов.