Билиҥҥи бары өттүнэн уустук кэмҥэ киһиэхэ болҕомто ууран, күүс-көмө өйөбүл буолар биирдиилээн дьоннор да, тэрилтэлэр да биһиги Бүлүүбүтүгэр баалларыттан киһи эрэ үөрэр, махтанар.
Ол курдук кырдьаҕас Бүлүү куоратын 77 саастаах олохтооҕо Мария Кирилловна Захарова өр сылларга “Вилюйавтодор” суол тэрилтэтин Бүлүүтээҕи учаастагар үлэлээн баран, биэнсийэтигэр сынньалаҥҥа тахсыбыта. Куорат Мир уулуссатыгар бэрт өрдөөҕүтэ тутуллубут суол учаастагын түөрт квартиралаах уопсай дьиэтигэр олохсуйан олорбута ыраатта. Сыл-хонук аастаҕын аайы эргэ тутуу онон-манан алдьанан, олорор усулуобуйатын улам ыаратан иһэр. Онтон Мария Кирилловна бэйэтэ кэнники сылларга ыарытыйан, ханна да барар-кэлэр кыаҕа суох буолан, дьиэтиттэн тахсыбакка олорор.
Кэнники сылларга дьиэтэ өссө эргэрэн, ардахха сарайынан тэстэн, ыксаан иһитин-хомуоһун барытын муостаҕа тэлгэтэн, үөһэттэн дьиэни курдаттыы түһэр ууну тоһуйан уурталыыр буолбута. Аны кини тиэргэнин иһинэн ааһар урукку ититэр систиэмэ турбатын быраҕыллыбыт теплотрассата кыайан хостонон хомуллубакка сытарыттан сылдьарыгар, үөһэ, аллара түһэригэр эрэйдэнэр этэ. Бу кыһалҕаларын таһынааҕы ыаллара бэлиэтии көрөн, Бүлүүтээҕи “Автодор” суол учаастагын салайааччытыгар, оройуон Сэбиэтин депутатыгар Прокопий Владимирович Протопоповка көмөлөһөллөрүгэр көрдөспүттэрэ.
Биллэн турар, кини бастаан үп-харчы боппуруоһугар тэрилтэбит эмиэ ыарахан туруктаах олорор диэбитэ, ол да буоллар үүт-хайаҕас булан, Мария Кирилловна дьиэтигэр-уотугар көрсүбүт кыһалҕатын олохтоохтук быһаарбыта улахан хайҕаллаах дьыала буолар.
Онон бу күннэргэ улахан ардахтар кэлиэхтэрин иннинэ кылгас кэмҥэ Мария Кирилловна дьиэтин сарайын суол үлэһиттэрэ быыс булан, саҥаттан уларытан биэрбиттэрэ, тиэргэнигэр быраҕыллан сыппыт теплотрассаны көтүрэн, ыраастаан кээстилэр. Итиэннэ эргэрбит олбуорун баҕаналарын уларытан, аныгылыы матырыйаалынан саҥаттан олбуордаатылар.
Федеральнай айан суолугар эргэрэн, алдьанан-кээһэнэн турбут урукку олбуор саҥалыы оҥоһуллан куораппыт тас көстүүтүгэр эмиэ биир үчүгэй өрүттээх буолла.
— Урут үлэлээбит тэрилтэм миигин умнубат, бу олус элбэх кыһалҕабын быһаара охсон улаханнык көмөлөстүлэр. Онон “Автодор” Бүлүүтээҕи учаастагын салайааччытыгар Прокопий Владимирович Протопоповка уонна тэрилтэм бары үлэһиттэригэр махталым муҥура суох. Итини сэргэ хаһан эрэ уурайбыт кырдьаҕас киһини – миигин бырааһынньыгынан эмиэ эҕэрдэлээччилэр, барахсаттарым олох умнубаттар.
Чугастааҕы ыалларбар эмиэ улахан махталбын тириэрдэбин. Миигин олохпор көрсүбүт кыһалҕабын кытта соҕотохтуу хаалларан кээспэккэ, тэрилтэбэр баран-кэлэн кэпсэтэннэр улахан күүс-көмө буоллулар. Итини этэн эрдэхтэрэ: “Ойуурдаах куобах охтубат”, — диэн.
Ханнык баҕарар киһи сааһыран, кыаммат буоллаҕына олоҕор ыарахаттары көрсөрө хаһан баҕарар баар суол. Онон улууһум тэрилтэлэрин салайааччылара урут үлэлээбит дьоҥҥутун умнууга хаалларымаҥ, кинилэр кыһалҕалаах кэмнэригэр, бу мин үлэлээбит тэрилтэм курдук, күүс-көмө, өйөбүл-тирэх, сүбэ-ама буолуҥ диэн көрдөһөбүн уонна ыҥырабын.
Үлэлээбит тэрилтэбэр – дорожнайдарбар уонна аттыбар олорор чугас ыалларбар, кылаабынайа, чэгиэн доруобуйаны, этэҥҥэ буолууну баҕарабын, — диэн Мария Кирилловна үөрэн-долгуйан туран, дьонугар-сэргэтигэр махталын тириэрдэр.
Муза Федорова.