Өкүндү нэһилиэгэр Сахабыт сирин күнүн Варвара Петровна Трофимова аатынан оскуолаҕа үөрэнээччилэри, учууталлары уонна нэһилиэк кырдьаҕастарын кытта үөрүүлээх быһыыга-майгыга тэрийэн ыыттыбыт.
Тэрээһин олохтоох дьаһалтабыт баһылыга Никифор Владимирович эҕэрдэтинэн саҕаланна. Салгыы Социалистическай Үлэ Геройа Варвара Трофимова бюһугар мустубут дьон бука бары сибэкки дьөрбөтүн уурдубут. 6-с кылаас үөрэнээччитэ, хомуска өрөспүүбүлүкэтээҕи «Полярная звезда» куонкурус лауреата Ян Захаров хомуска сахалыы матыыптар диэн дьүһүйүүтүнэн эҕэрдэлээтэ. Өкүндү бочуоттаах олохтооҕо Нина Михайловна Иванова истиҥ тылларын ыччаттарыгар алгыһын, үтүө сүбэтин тириэртэ. Түмүгэр Саха Өрөспүүбүлүкэтин култууратын туйгуна Агафья Николаевна Петрова «Сахам сирин уруйдуубун» диэн хомоҕой тыллаах оһуокайынан түмүктэннэ. Бар дьоммут Сахабыт сирэ сайда — үүнэ турарыгар бары күүспүтүн түмэн, үлэлииргэ, үөрэнэргэ кыһаллыаҕыҥ.
Күммүт иккис аҥарыгар «Мин дойдум — Сахам сирэ» диэн түөлбэнэн күрэхтэһии буолла. Күрэх 6 түһүмэхтээх: кроссворд таайыыта, туос оонньуута, «Кини кимий?» ыйытыктар, ырыаны таайыы, Саха сирин улуустарын гербэлэрин таайыы уонна сахалыы оонньуу ыытылынна. Кыттааччыларбыт үс көлүөнэттэн састааптаах хамаанда туруораллара ирдэнэр буолан, олус интэриэһинэйдик барда. Оскуола оҕото, эдэр ыччат уонна 45-тэн үөһэ саастаах дьон. Күүстээх күрэхтэһии кэнниттэн «Сардаана» түөлбэ кыайыылаах бастакы миэстэни ыланнар үөрдүлэр. Иккис бочуоттаах миэстэ — «Саһарҕа» түөлбэ. Үһүс бочуоттаах миэстэни «Байылыат» түөлбэ ылла. Олус интэриэһинэй, киһи көрө олоруон курдук үчүгэй тэрээһин. Күрэххэ кыттыбыт оҕолорбутугар, ыччаттарбытыгар, аҕам саастаахтарбытыгар махталбытын тиэрдэбит. Өрүүтүн да көхтөөх буоларгытыгар баҕарабыт.
Анна Мандарова- Харатай кыыһа, Өкүндү.