Бүлүүгэ бүгүн, Кутурҕан уонна кэриэстэбил күнүгэр, Албан Аат болуоссатыгар дьон-сэргэ миитиҥҥэ муһунна. Бу күн биһиги курутуйабыт төрөөбүт сиригэр-уотугар төннүбэтэх саллаакка, сэрии ыар сылларыгар аччыктаан, ыалдьан суорума суолламмыттарга, дьоллоох оҕо сааһы билбэтэх оҕолорго… Бүлүү олохтоохторо сэрии сиэртибэлэрин санаан, кэриэстэбил тылларын эттилэр, Умуллубат уокка тыыннаах сибэккилэри уурдулар.
Миитин “Журавли” диэн Расул Гамзатов тылларыгар суруллубут ырыанан саҕаланна. Миитиҥҥэ оҕо лааҕырдарын кэллэктииптэрэ, биирдиилээн дьон, ис дьыала органнарын сотрудниктара, Бүлүү улууһун баһылыгын социальнай боппуруостарга солбуйааччы Александр Игоревич Комаров, “Бүлүү куорат” муниципальнай тэриллии баһылыгын солбуйааччыта Николай Варламович Иванов, Бүлүү улууһун бэтэрээннэрин Сэбиэтин бэрэссэдээтэлэ Федор Федорович Николаев, Бүлүү улууһун Аҕаларын Сүбэтин бэрэссэдээтэлэ Юрий Иванович Тутукаров кытыннылар.
— Бүлүү улууһуттан уоттаах сэрии толоонугар1988 киһи барбыта, олортон 1034 киһи олохторун толук уурбуттара. Хомойуох иһин, улахан аҥаардара. Арай, кинилэр бары, эбэтэр элбэх киһи кэлбитэ буоллар, саатар, өссө биир киһи, саатар, өссө уон киһи кэлбитэ буоллар, төһөлөөх ыччат төрүө-үөскүө эбитэ буоллар, төһөлөөх үлэлиэхтэрэ-хамсыахтара эбитэ буоллар. Саамай чулуу дьоннорбут суох буолбуттара. Ол курдук, биһиги дойдубут үрдүнэн 27 мөлүйүөнтэн тахса киһи суох буолбута. Билигин биһиги уолаттарбыт эмиэ бу маннык фашизм үөскүүрүн иһин арҕаа диэки бараннар, фашизмы суох гынарга олохторун толук ууран тураннар дойдубутун көмүскүү сылдьаллар. Ол иһин биһиги ааспыт уонна билиҥҥи буойуттарбытын хаһан да умнуо суохтаахпыт, албан ааттарын өрүү ааттыы сылдьыахтаахпыт, — диэн улуус баһылыгын солбуйааччыта Александр Комаров тоһоҕолоон бэлиэтээтэ.
Миитин кыттыылаахтара кэриэстээһин мүнүүтэтэ биллэриллибитигэр чуумпуран, иһийэн турдулар.Ол кэннэ Умуллубат уот пааматынньыгар тыыннаах сибэккилэри уурдулар.
Изольда Загитова.