Борис Васильев, А.И.Николаев аатынан «Албан аат» түмэлин салайааччыта, бойобуой дьайыы бэтэрээнэ.
Аҕам саастаахтар күннэрин дэкээдэтин чэрчитинэн, түмэлбитигэр «Кыайыы» диэн күһүҥҥү оскуола үлэлээтэ.
Ол курдук, сэттиэлэ устата, аҕам саастаах дьоммутугар араас тэрээһиннэри ыыттыбыт. Бастакы күн “Албан аат” болуоссатыттан экскурсия саҕаланна. Бу болуоссат дириҥ историятын, пааматынньыктарын, өйдөбүнньүк оҥоһууларын о.д.а. тустарынан сиһилии билистилэр. Ол кэннэ, түмэлбитигэр киирэн, элбэх сонун историческай чахчыларга олоҕурбут кэпсээннэри иһиттилэр.
Оскуола аата оскуола, хас биирдии үөрэнээччибитигэр күннүк бэлэмнээн түҥэттибит. Күн аайы сыана турар уонна дьиэҕэ сорудах бэриллэр. Дьарыктарбыт бииртэн-биир уратылар, холобур, уруһуйдууллар, тобуллаҕас өй күрэҕэ, уйулҕаһыты кытта көрсүһүү, сэрии кэминээҕи ырыалары ыллыыллар, уус-уран киинэлэри көрөллөр о.д.а.
Түмүккэ, күһүҥҥү оскуоланы бүтэрбиттэрин туоһулуур ситии-хотуу аттестата уонна махтал сурук туттарылынна. Түгэнинэн туһанан, оскуола тэрээһинигэр күүс-көмө буолбут Бүлүү куорат баһылыгар Ян Поповка, П.Х.Староватов аатынан кыраайы үөрэтэр түмэл дириэктэригэр Татьяна Афанасьеваҕа махтал тылларын тиэрдэбит!
Аҕам саастаах дьоммутугар чэгиэн-чэбдик туругу, дьиэҕит иһигэр куруук сырдык эрэ сыдьаайдын, этэҥҥэ буолуҥ!
“Кыайыы” күһүҥҥү оскуола үөрэнээччилэрин санаалара:
— «Кыайыыга» күһүҥҥү оскуолаҕа сылдьаммын өй күрэҕэр кыттан, ыллаан, уруһуйдаан астынан, дуоһуйан, сорох кэмҥэ сонньуйан ылан, биир үөлээннээхтэрбитин кытта билистибит. Салайааччыбыт Борис Васильев олус үчүгэйдик тиэмэтин кэпсиирин киһи эрэ истэн олоруох курдук.
Өссө киинэ көрөн астынныбыт.
Бу маны салайан ыыппыт, тэрийбит дьоҥҥо улахан махтал. Үлэҕит инникитин да таһаарыылаах буоллун.
Арыылаах Харыстаана Айан кыыһа.
— “Мин “Кыайыыга” сылдьан, Бүлүүм историятын саҥа истэн, элбэҕи биллим-көрдүм.
Ити курдук, салгыы салҕанара буоллар өссө үчүгэй буолуо этэ. Саастаах дьон бачча сааспытыгар диэри билбэтэхпитин биллибит диэн астынным.
Евдокия Тимофеева.
— “Кыайыыга” күһүҥҥү оскуола тэрийээччилэригэр улахан махталбын тиэрдэбин!
Олус интэриэһинэй, туһалаах тэрээһиннэри тэрийбиттэригэр. Баҕарабын кытаанах доруобуйаны, үлэҕитигэр ситиһиилэри!
Анна Мындаева.