Биһиги аҕабыт, Бүлүү улууһун, Бүлүү куоратын бочуоттаах олохтооҕо, государственнай сулууспа бэтэрээнэ, Федор Федорович Павлов, баара буоллар, бу сыл кулун тутар 10 күнүгэр 85 сааһын туолуо этэ.
Кини 1939 с. Үөһээ Бүлүү оройуонун I-кы Үөдүгэй нэһилиэгэр холхуостаах дьиэ кэргэнигэр төрөөбүтэ. Үс саастааҕыттан Бүлүү куоратыгар улахан эдьиийигэр Маныкина Татьяна Федоровнаҕа иитиллибитэ. 1960 с. Н.Г. Чернышевскай аатынан Бүлүүтээҕи педагогическай училищены, 1973 с. СГУ ИФФ историяҕа салаатын, 1983 с. ССКП Саха сиринээҕи обкомун марксизм-ленинизм университетын кыһыл дипломунан үөрэнэн бүтэрбитэ.
Үлэтин 1960 с. Үгүлээт орто оскуолатын физкультураҕа учууталынан саҕалаабыта. 1964-1968 сс. Бүлүү куорат 8 кылаастаах оскуолатыгар история, физкультура учуутала, 1968-1970 сс. Бүлүү оройуонун физкультураҕа уонна спорка кэмитиэтин салайааччыта. 1970 с. Бүлүү куоратын депутаттарын Сэбиэтин бэрэссэдээтэлинэн ананан, 1981 с. ыам ыйыгар диэри үлэлээбитэ. 1981 с. Бүлүү оройуонун суолун уонна эргиэнин тэрилтэлэрин ситиһиилээхтик салайбыта. 1983-1986 сс. Бүлүү улууһун бытовой комбинатын салайбыта, онно улэлэбит кэмнэрин туһунан 2015 с. тахсыбыт “Уһун сылларга умнуллубат өйдөбул” кинигэҕэ ыстатыйа суруйбута.
1986 сылтан Бүлүү оройуоннааҕы норуодунай депутаттарын Сэбиэттэрин уопсай отделын сэбиэдиссэйинэн, дьыалаларын дьаһайааччынан Сэбиэттэр үлэлэрэ тохтотуллуор диэри үлэлээбитэ.
Оскуолаҕа үөрэнэр сылларыттан саҕалаан спордунан күүстээхтик дьарыктаммыта. 1956 с. К.П. Григорьев дьарыктыыр көҥүл тустуу секциятыгар суруттарбыта. Ол сыл ахсынньытыгар Бүлүү оройуонун бастакы чемпионатын кыттыылааҕа. 1958 с. Саха сирин норуоттарын II–с сайыҥҥы спартакиадатыгар 78 кг өрө тахсан иккис миэстэлэммитэ. 1959 с. күһүнүгэр «Труд» ДСО күрэхтэһиитигэр 67 кг иккис миэстэни ылбыта, 1959 с. бастакы, иккис разрядтаах бөҕөстөр икки ардыларыгар буолбут квалификационнай күрэхтэһиигэ бастакы разряд нуорматын толорбута, ол сыл Саха сирин ыччатын фестивалын спортивнай оонньууларыгар аатырбыт тустууктар В. Данилов, Э. Гегеев кэннилэриттэн үһүс буолбута. 1960 с. Саха сирин норуоттарын III-c сайыҥҥы спартакиадатыгар Чурапчы бөҕөһө С. Попов кэнниттэн иккис миэстэҕэ тахсыбыта. Саха сирэ-Дагестан хамаандаларын табаарыстыы көрсүһүүлэригэр кыттыбыта. 1960-1964 сс. «Спартак» ДСО көҥүл тустууга, 1964 с. көҥүл тустууга эрэ буолбакка, классическай тустууга эмиэ чемпионнаабыта. Үрдүк үөрэх, наука тэрилтэлэрин профсоюзтарын 1965 с. спартакиадатыгар бастаабыта. 1965 с. өрөспүүбүлүкэтээҕи Н.Н. Тарскай кубогар Х-с чемпионакка бастаабыт Бүлүү хамаандатын чилиэнэ, тренерэ. 1970 с. өрөспүүбүлүкэтээҕи (РСФСР) категориялаах тустуу судьуйата. 1958-1970 сс. Бүлүү оройуонугар көҥүл тустууга общественнай тренерэ.
Үлэлээбит оскуолаларыгар, Бүлүү куоракка оҕолору, ыччаттары эрчийбитэ. Көҥүл тустууга ССРС спордун маастардара Федот Федотов, Алексей Пахомов, маастарга кандидаттар Гаврил Романов, Сергей Иванов, Валерий Данилов уо.д.а. бастакы тренердэрэ.
Күндү киһибит өр сыллаах үтүө суобастаах үлэтэ үрдүктүк сыаналаммыта. «Килбиэннээх үлэтин иһин В.И. Ленин төрөөбүтэ 100 сыла», «Үлэ бэтэрээнэ» мэтээллэринэн, «Гражданскай килбиэн» анал бэлиэтинэн, Саха АССР Үрдүкү Сэбиэтин Бочуотунай грамотатынан наҕараадаламмыта. Саха сирин физическэй культураҕа, спорка туйгуна уонна үтүөлээх үлэһитэ.
Алта кинигэ, ол иһигэр спорка аналлаах түөрт кинигэни бэчээттэппитэ, 1958 с. саҕалаан өрөспүүбүлүкэ уонна оройуон хаһыаттарыгар элбэх ыстатыйалара тахсыбыта. Бүлүү улууһун спордун бэтэрээннэрин Сэбиэтин салайбыта.
Ийэбитинээн Нина Романовналыын 59 сыл тухары бииргэ олорон, 4 оҕоҕо күн сирин көрдөрөн, 8 сиэн, 4 хос сиэн тапталлаах эбэтэ, эһэтэ буолбуттара. 2023 с. төрөппүттэрбит тустарынан, кинилэр ааттарын үйэтитээри “Үлэҕэ, сайдыыга анаммыт олох” диэн кинигэни таһаарбыппыт. Биһиги дьоммут биһиэхэ куруутун холобур буолаллар, кинилэринэн биһиги киэн туттабыт.
Уола Алексей Павлов.