М.Н. Жирков аатынан оройуоннааҕы култуура Дыбарыаһыгар Бүлүү улууһугар Арассыыйаҕа сомоҕолоһуу, Саха сиригэр култуура, Бүлүү улууһугар утумнааһын уонна үүнүү-сайдыы, Бүлүү куоратыгар үтүө санаа уонна куорат туһугар үлэ Сылларын үөрүүлээхтик арыйыы тэрээһинэ үрдүк таһымнаахтык тохсунньу 30 күнүгэр буолан ааста.
Саха сиригэр култуура сылын түһүмэҕэр нэһилиэктэргэ, куоракка үлэлии-айар култуура ситимин тэрилтэлэрин үлэһиттэрэ, түмсүүлэр кыттыылаахтара 200-тэн тахса киһи сэлэлээн киирэн үөртүлэр, долгуттулар.
Түһүмэх өрөгөйдөөх түгэнинэн «Бүлүү — култуура биһигэ» саҥа ырыа сүрэхтэниитэ буолла. Ырыа ааптардара — олохторун култуураҕа анаабыт култуура сайдыытын уонна норуот айымньытын Оройуоннааҕы киинин исписэлиистэрэ, Саха Өрөспүүбүлүкэтин култууратын үтүөлээх үлэһиттэрэ методист Надежда Иванова уонна хормейстер Ольга Корякина.
Үтүмэнниир кэмнэртэн оһуохайбыт бүлүүлүү,
Үгүс үйэ күөнүттэн хомус иэйэр бүлүүлүү.
Бүлүү ытык сириттэн силис тардар опера,
Бүлүү Эбэ үрдүнэн дайар таптал ырыата.
(хос ырыата)
Күннээх үөрүү бэлэхтиир сыдьаай сырдык идэлээх,
Куту-сүрү күүһүрдэр айылҕаттан аналлаах
Кыайыыларга кынаттыыр, түмсүүбүтүн түстэһэр,
Култууралар буолабыт, Бүлүүбүтүн таптыыбыт.
диэн ырыа уран тылларыгар, өрө көтөҕүллүүлээх матыыбыгар Бүлүүбүт култууратын баай ис хоһооно, үйэлээх үтүө үгэстэрэ, билиҥҥи айымньылаах үлэтэ, култуура үлэһиттэрин анала арыллар.
Тэрээһин кыттыылаахтара сэргээбиттэрин дохсун ытыс тыаһынан бигэргэттилэр.
Бүлүү култууратын үлэһиттэрин саҥа ырыаларынан эҕэрдэлиибит!
Ырыаҕыт тылларын курдук кыайыыларга кынаттыы, түмсүүнү түстэһэ, дьоҥҥутун-сэргэҕитин үөрдэ, этэҥҥэ сылдьыҥ!
Изольда Загитова.