Тохсунньу бүтүүтэ П.Х. Староватов аатынан кыраайы үөрэтэр мусуой пуондатын үлэһиттэрэ Дьокуускай куоракка тыыл бэтэрээнэ, СӨ култууратын туйгуна, биллиилээх этнограф, краевед, коллекционер Семен Викторович Телье-Иванову кытта көрсөн, кэпсэтэн, Аҕа дойду сэриитин историятын хаҥатыыга аналлаах экспонаттарын бэлэх тутан, илдьэ кэллилэр.
Семен Викторович коллекционер быһыытынан олоҕун устата экспедицияларга даҕаны сылдьан, бэйэтэ даҕаны элбэх матырыйаал мунньубутун кэпсээтэ. Кини былыргы сахалар олохторун, Аҕа дойду Улуу сэриитин тустарынан үөрэтэн, дьоҥҥо-сэргэҕэ, үүнэр көлүөнэҕэ тарҕатааччы, сайыннарааччы быһыытынан киэҥник биллэр.
Саха сиригэр киэҥник биллибит Улуу Кыайыыга анаммыт 60-ча сыл устата мунньубут аккырыыккаларын уонна сэбиэскэй худуоһунньуктар сэрии сылларыгар аналлаах хартыыналарын репродукцияларын, онтон да атын маллары, уопсайа 639 экспонаты Бүлүүтүн мусуойугар бэлэхтээн туттарда. Хас биирдии көрөөччү дууһатын таарыйар Аҕа дойду сэриитин туһунан кэпсиир хартыыналар репродукцияларын быыстапката Улуу Кыайыы күнүн көрсө ыам ыйыгар турара былааннанар.
Аккырыыкка коллекцията Аҕа дойдуну көмүскээччи күнүгэр анаан Бүлүү куоратыгар А.И. Николаев аатынан Албан аат мусуойугар туруоҕа. Саха дьонун кутун туппут патриотическай тыыннаах быыстапканы Бүлүү куоратын олохтоохторун, ыалдьыттарын, оҕолору олунньу 19 күнүттэн кэлэн көрөргүтүгэр ыҥырабыт.
Екатерина Михайлова, мусуой пуондатын харайааччыта.