«Хаарбах уонна сахалланар туруктаах дьиэттэн көһөрүү» бырагырааматынан 2024 сыллаахха Бүлүү куоратын Ф.М.Бубякин уулуссатыгар 6 элбэх квартиралаах дьиэ тутуллан үлэҕэ киириэхтээх, малааһын тэриллиэхтээх этэ. «СӨ судаарыстыбаннай сакаасчытын сулууспата» улуус, куорат дьаһалталарын туруорсууларынан элбэх дьиэни тутарга өссө 2022 сыл алтынньы ыйыгар аукцион тэрийбитэ.
Аукциону Руслан Алибеков салайааччылаах «Русстрой» диэн тэрилтэ кыайбыта, тутуох буолан эрэннэрэн 100 мөл. солк харчыны эрдэ ылбыта. Тэрилтэ 2023 сыллаахха дьиэлэр сыбаайаларын эрэ түһэрбитэ уонна араастаан сылтаҕыран тохтообута… Кэлин тэрилтэ үп-харчы өттүнэн мөлтөх балаһыанньалааҕа биллибитэ.
«СӨ судаарыстыбаннай сакаасчытын сулууспата» дьиэлэри тутуохтаах «Русстрой» тэрилтэни кытта дуогабардары көтүрбүтэ, суукка биэрэн кыайбыта. Бу тэрилтэ элбэх эбийиэги тутарга эрдэттэн үп-харчы ылан баран туппатаҕа биллибитэ, сакаасчытттар тэрилтэни кытта элбэхтик суттаһан кыайбыттара.
Быйыл «Хаарбах уонна сахалланар туруктаах дьиэттэн көһөрүү» бырагырааматынан Саха Өрөспүүбүлүкэтигэр 12,5 млрд солк суумалаах федеральнай үп көрүлүннэ. Улуус, куорат салалталара СӨ Бырабыыталыстыбатын, «СӨ судаарыстыбаннай сакаасчытын сулууспата» тэрилтэни кытта ыкса үлэлэрин түмүгэр Ф.М.Бубякин уулуссатыгар тутуулара тохтоон турбут дьиэлэри ситэрэргэ сакаасчыт аукцион биллэрдэ.
Ити курдук, Ф.М.Бубякин улууссатыгар 2027 сыл алтынньы ыйыгар диэри 190 кв 6 тупсаҕай дьиэ үлэҕэ киириэхтээх. Итини сэргэ тиэргэннэри тупсарыы ыытыллыахтаах, носуостуур ыстаансыйа тутуллуохтаах.
СӨ олорор дьэни тутуу дириэксийэтэ эмиэ 2027 сыл алтынньы ыйыгар диэри Илбэҥэҕэ 2 мэндиэмэннээх 7 кв дьиэ, Бүлүү куоратыгар 4 мэндиэмэннээх 31 кв дьиэ тутуллан үлэҕэ киирэллэригэр аукцион биллэрдэ.
Ити курдук, Бүлүү улууһугар «Хаарбах уонна сахалланар туруктаах дьиэттэн көһөрүү» бырагырааматын үлэтэ сөргүтүлүннэ. «СӨ судаарыстыбаннай сакаасчытын сулууспата» бу сырыыга элбэх дьиэ тутуутун дьылҕатын эрэллээх тутааччыларга итэҕэйиэ диэн эрэниэххэ.
«Олох суола».