Соторутааҕыта Бүлүү куоратыгар арыллыбыт Дьиэ кэргэҥҥэ элбэх өҥөнү оҥорор кииҥҥэ улуус олохтоохторун бырааптарын араҥаччылааһыҥҥа бэрт сонун тэрээһин буолан ааста.
Ол курдук, от ыйын 30 күнүгэр Бүлүү улууһун борокуруора Марк Федоров байыаннай дьайыы кыттыылаахтарын уонна кинилэр дьиэ кэргэннэрин, саастарын ситэ илик оҕолордоох дьиэ кэргэннэр сокуонунан көрүллэр бырааптарын хааччыйыы боппуруоһугар улуус олохтоохторун кытта тус көрсүһүүтэ тэрилиннэ.
Улуус олохтоохторун кытта тус көрсүһүүгэ ханнык боппуруостар инники күөҥҥэ турбуттарын Бүлүү улууһун борокуруора Марк Федоров бу курдук билиһиннэрдэ:
— Бүгүн элбэх киһи кэлэн көрсүһэн, санааларын этинэн, туруорсан бардылар. Үксэ байыаннай дьайыы кыттыылаахтарын, саастарын ситэ илик оҕолордоох дьиэ кэргэннэртэн кэлэн көрүстүлэр. Үгүс өттүгэр байыаннай дьайыы кыттыылаахтарыгар көмөнү оҥоруу дьаһалларын кытта ситимнээх боппуруостар турдулар диэххэ сөп.
Тус көрсүһүүгэ кэлбит дьон, холобура, байыаннай дьайыы кыттыылаахтарыгар төлөбүрү оҥорууну, дьиэ кэргэҥҥэ оҕону төнүннэриини, үлэ боппуруостарын кэпсэтэн, этинэн туруорустулар.
Улуус олохтоохторун этиниилэрин хонтуруолга тутуохпут, — диэн Марк Федоров тус көрсүһүү түмүгүн быһааран биэрдэ.
Итини сэргэ, улуус олохтоохторун кытта куорат дьаһалтатын, военкомат, улуус дьаһалтатын социальнай уонна эдэр ыччат бэлиитикэтин отделын эппиэттээх үлэһиттэрэ көрүстүлэр уонна туруорсууларын, этиниилэрин хонтуруолга ыллылар.
Бүлүү куоратыгар тэриллибит байыаннай дьайыы кыттыылаахтарын уонна кинилэр дьиэ кэргэннэрин, саастарын ситэ илик оҕолордоох дьиэ кэргэннэр бырааптарын араҥаччылыыр ис хоһоонноох көрсүһүүнү улуус баһылыгын социальнай боппуруостарга солбуйааччы Александр Комаров сүрүннээн ыытта.
Николай Куприянов.