“СӨ Судаарыстыбаннай сакаасчытын сулууспата” ГКУ салалтата Бүлүү куоратыгар квартальнай тутууну билистэ. “СӨ Судаарыстыбаннай сакаасчытын сулууспата” ГКУ генеральнай дириэктэрин э.т. Андрей Павлов, ГКУ тыа сиригэр тутуу управлениетын салайааччы Никифор Саввинов, улуус баһылыгын бырамыысаланнаска уонна инфраструктураҕа солбуйааччы Эдуард Эверстов уо.д.а. Бүлүү куоратыгар Ф.М.Бубякин уулуссатыгар “Хаарбах туруктаах дьиэттэн көһөрүү” бырагырааманан тутуллар квартальнай тутуу эбийиэктэрин көрдүлэр, үлэни кыһыннары харгыһа суох ыытарга, электроэнергиянан хааччыллыы ситиһиллэригэр туох оҥоһуллуохтааҕын билистилэр, бэдэрээттэһэр тутуу тэрилтэлэрин бэрэстэбиитэллэрин кытта кэпсэттилэр.
Санаттахха, бу кварталы тутууга 100 мөл. солк. абаансанан ылбыт «Русстрой» тэрилтэ бэйэтин кэннэ алта дьиэ сыбаайаларын эрэ хаалларбыта. “СӨ Судаарыстыбаннай сакаасчытын сулууспата” ГКУ үбү төнүннэрэргэ бэдэрээччити кытта сууттаспыта. Сайын улуус борокуруора Марк Федоров 131 мөл. солк. хоромньуга холуобунай дьыала тэрийбитэ.
Быйыл көһөрүү бырагырааматынан 12,5 млрд солк үп көрүллүбүтүгэр Бүлүүгэ элбэх квартиралаах 6 таас дьиэни тутуу саҕаламмыта уонна кэлэр сыл бүтүүтэ түмүктэниэхтээх. Элбэх квартиралаах дьиэлэр тутууларын сакаасчытынан “СӨ Судаарыстыбаннай сакаасчытын сулууспата” ГКУ буолар.
Күн иккис аҥарыгар Андрей Павлов улуус дьаһалтатыгар тутааччылары кытта көрсүһүүтүгэр тутуу болдьоҕо ыгымынан кыһыҥҥы кэмҥэ бетон үлэтин ыытарга, подстанцияҕа уот ситимин тиэрдэн электроэнергиянан хааччыйарга болҕомтону туһаайда, санааларын иһиттэ, соруктары туруорда.
“СӨ Судаарыстыбаннай сакаасчытын сулууспата” генеральнай дириэктэрэ бэлиэтээбитинэн, бүгүҥҥү күҥҥэ тутуу бэлэмэ 20% тэҥнэһэр.
Итини сэргэ, быйыл Бүлүү куоратыгар Мир уонна Горькай уулуссаларыгар, Илбэҥэҕэ элбэх квартиралаах таас дьиэлэр тутуулара саҕаланна, Халбаакыга 4 квартиралаах мас дьиэ тутуута ахсынньы ыйга түмүктэниэхтээх.
Николай Куприянов