От ыйын 8 күнүгэр — Дьиэ кэргэн, таптал уонна бэриниилээх буолуу күнүгэр Бүлүү куоратын Пушкин уулуссатын 20 нүөмэригэр Дьиэ кэргэҥҥэ элбэх өҥөнү оҥорор киин, С.М.Аржаков аатынан дьиэ кэргэҥҥэ иитиини өйүүр киин, Н.С.Гоголев аатынан аҕам саастаах уонна инбэлиит дьон доруобуйаларын чөлүгэр түһэрэр күнүскү салааларын үөрүүлээх арыйыы, “Ыллыыр кумахтаах” кытылга өр сыл бииргэ олорбут дьиэ кэргэннэри чиэстээһин тэрилиннэ.
Биир сиргэ үс социальнай тэрилтэни үөрүүлээх арыйыы түгэнигэр мустубут дьону С.М.Аржаков аатынан дьиэ кэргэҥҥэ иитиини өйүүр киин дириэктэрэ Егор Дашевскай, социальнай көмүскэл управлениетын салайааччы Алина Каратаева, үлэ уонна социальнай сайдыы миниистирэ Елена Волкова, улуус баһылыга Сергей Винокуров, оройуон Сэбиэтин бэрэссэдээтэлэ Гаврил Корякин, Бүлүү куорат мэрэ Ян Попов уо.д.а. эҕэрдэлээтилэр, өрөспүбүлүкэ таһымнаах бэлиэлэри, Бочуоттаах кырааматалары, Махтал суруктары, сэмэй бэлэхтэри туттардылар.
Үөрүүлээх тэрээһиҥҥэ өрөспүүбүлүкэ бэтэрээннэрин Сэбиэтин бэрэссэдээтэлэ Аркадий Саввинов, үлэ уонна социальнай сайдыы министиэристибэтин эппиэттээх үлэһиттэрэ Василий Константинов, Айсен Мярикянов, улуус баһылыгын социальнай эйгэҕэ солбуйааччы Александр Комаров, улуус бэтэрээннэрин Сэбиэтин бэрэссэдээтэлэ Федор Николаев, социальнай тэрилтэлэр кэлэктииптэрэ кытыннылар.
Миниистир Елена Волкова Бүлүүгэ арыллыбыт Дьиэ кэргэҥҥэ элбэх өҥөнү оҥорор киин өрөспүүбүлүкэҕэ 8 киин, Бүлүү бөлөх улуустарыгар бастакы буоларын, киин уустук балаһыанньаҕа киирбит оҕолоох дьиэ кэргэннэргэ араас өрүттээх көмөнү оҥоруохтааҕын билиһиннэрдэ.
Улуус баһылыга Сергей Винокуров үс социальнай эбийиэги үлэҕэ киллэрии хас да сыл устата быһаарыллан, силигин сиппитин бэлиэтээтэ.
Ити курдук, Бүлүү куоратын киинигэр үс социальнай эбийиэк биир күн үлэҕэ киирдэ. Тутууну Семен Степанов салайааччылаах олохтоох “Сигма” тэрилтэ ыытта.
Үөрүүлээх тэрээһин кэннэ ыалдьыттар эбийиэктэргэ сылдьан маастар-кылаастары көрдүлэр.
Дьиэ кэргэн, таптал уонна бэриниилээх буолуу күнүгэр “Ыллыыр кумахтаах” кытылга элбэх улахан дьон, оҕо тоҕуоруһуулаах бырааһынньык тэрилиннэ.
Саҥа хааман эрэр кыра оҕолор хаамыыга, сүүрүүгэ куоталаһыылара бэртэ сэргэхтик ааста, дьон болҕомтотун тарта.
Дьиэ кэргэн, таптал уонна бэриниилээх буолуу күнүгэр уһуннук, эйэлээхтик, доллоохтук бииргэ олорбут ыаллары чиэстээтилэр. Улуус баһылыгын социальнай эйгэҕэ солбуйааччы Александр Комаров үйэ аҥара бииргэ олорбут Любовь Ивановна уонна Владимир Иванович Федотовтарга, 25 сыл бииргэ олорбут Фатима Лукинична уонна Владимир Михайлович Степановтарга улуус баһылыгын Эҕэрдэ суруктарын, 5 тулаайах оҕону ылан иитэр Өкүндүттэн Любовь Владимировна Константиноваҕа “Үтүө санаатын уонна амарах сыһыанын” иһин бэлиэни туттарда.
Бүлүүтээҕи ЗАГС салайааччыта Марина Иванова үйэ аҥара бииргэ олорбут Любовь Ивановна уонна Владимир Иванович Федотовтар ЗАГС Бочуот кинигэтигэр киирбиттэрин иһитиннэрдэ, кинигэҕэ илии баттатта.
Үлэ уонна социальнай сайдыы миниистирэ Елена Волкова өр сылларга бииргэ эйэлээхтик, уһуннук олорбут Бороҕонтон Вера Филипповна уонна Семен Иванович Федоровтар, Тааһаҕартан Наталья Дмитриевна уонна Дмитрий Андреевич Григорьевтар, Чочуттан Александра Яковлевна уонна Алексей Никитич Васильевтар дьиэ кэргэннэригэр Арассыыйа “Таптал уонна бэриниилээх буолуу” мэтээллэрин, Любовь Ивановна уонна Владимир Иванович Федотовтарга “Дьиэ кэргэн килбиэнэ” бэлиэни туттарда.
Дьиэ кэргэн, таптал уонна бэриниилээх буолуу күнэ Бүлүү куоратыгар үс социальнай эбийиэги үлэҕэ киллэриинэн, олохторунан холобур буолар дьиэ кэргэннэри чиэстээһининэн уратытык тэрилиннэ.
Николай Куприянов.