Бүгүн, муус устар 13 күнүгэр, Бүлүү улууһун 20-тэн тахса киһилээх дэлэгээссийэтэ Дьокуускайга «Биир ньыгыл Арассыыйа» баартыйа «Түмүк баар!» диэн биэс сыллаах үлэтин түмүгүн отчуоттуур, инники сайдыыны торумнуур өрөспүүбүлүкэтээҕи форумугар көхтөөх кыттыыны ылла.
Форумҥа Норуот бырагырааматын — кэнники 5 сылга баартыйа бырайыактарынан өрөспүүбүлүкэ социальнай—экономическай сайдыытыгар ситиһиллибит кирбиилэри, инники барыллары уонна хайысхалары дьүүллэстилэр.
Форум хайдах ааспытын «Биир ньыгыл Арассыыйа» баартыйа Бүлүүтээҕи олохтоох отделениетын салайааччы, оройуон Сэбиэтин депутата Павел Иннокентьев бу курдук билиһиннэрдэ:
— Форум саҕаланыыта «Биир ньыгыл Арассыыйа» баартыйа Саха сиринээҕи салаатын ситэриилээх кэмитиэтин салайааччы Надежда Селютина бүгүҥҥү тэрээһиҥҥэ Норуот бырагырааматын олоххо киллэриигэ нэһилиэнньэ этиитин толоруу үлэтин түмүктэрин төгүрүк остуолларга ырытыахпыт уонна иккис бырагыраамаҕа саҥа этиилэри түмүөхпүт диэн тоһоҕолоон бэлиэтээбитэ.
Бүлүү улууһун дэлэгээссийэтин састаабыгар улуус баһылыга Сергей Винокуров, депутаттар оройуоннааҕы Сэбиэттэрин бэрэссэдээтэлэ Гаврил Корякин, баһылыктар, депутаттар, баартыйа бастакы сүһүөх тэрилтэлэрин салайааччылара, чилиэннэрэ кыттыыны ыллылар.
Бүгүн Норуот бырагырааматын Дьокуускай куоракка тутуллубут саҥа эбийиэктэргэ: өрөспүүбүлүкэтээҕи Онкология киинигэр, «Өрөгөй» киинин таһынааҕы Сайсары күөл кытылыгар, М.Е.Николаев аатынан куорат 40 №-дээх оскуолатыгар сырыттыбыт.
Форум кэмигэр «Территориялары сайыннарыы – куоракка уонна тыа сиригэр олох хаачыстыбатын тупсарыы», «Кыайыы туһугар бииргэ буолуу», «Креативнай экэниэмикэ», «Култуура кода – төрөөбүт дойду айар-тутар энергията» уо.д.а. элбэх төгүрүк остуол үлэлээтэ. Кыттааччылар үөрэхтээһиҥҥэ, доруобуйа харыстабылыгар, култуураҕа, спорка уо.д.а. баартыйа бырайыактарын сүрүн өрүттэрин ырыттылар, санааларын этиннилэр.
«Территориялары сайыннарыы – куоракка уонна тыа сиригэр олох хаачыстыбатын тупсарыы» төгүрүк остуолга Бүлүү куорат баһылыга Ян Попов дойдуга бастыҥ бырайыак аатын ылбыт Бүлүү куорат «Ыллыыр кумахтаах кытыл» бырайыагы олоххо киллэриини билиһиннэрдэ, куорат саҥа бырайыактарын кэпсээтэ.
Төгүрүк остуолларга үөрэхтээһиҥҥэ, доруобуйа харыстабылыгар, тыа хаһаайыстыбатыгар, култуураҕа уо.д.а. киирбит дьоһуннаах этиилэр Норуот бырагыраамата 2.0 киириэхтэрэ.
Дэлэгээссийэ састаабыгар киирбит муниципальнай тэриллиилэр баһылыктара ыччат уонна социальнай коммуникация миниистирин, «Биир ньыгыл Арассыыйа» баартыйаттан Госдума депутатыгар хандьытааты быһаарар праймериз кыттыылааҕа, байыаннай дьайыы бэтэрээнэ Петр Шамаевы уонна култуура миниистирин Афанасий Ноевы көрүстүлэр. 
2021-26 сыллардааҕы Норуот бырагыраамата өрөспүүбүлүкэҕэ, ол иһигэр Бүлүү улууһугар күүскэ үлэлээбитин, түмүктээх буолбутун нэһилиэнньэ билэ-көрө, истэ сылдьар. Форумҥа Госдума быыбарын кэннэ Норуот бырагыраамата 2.0 олоххо киирэн барыахтааҕа, күүскэ үлэлиэхтээҕэ этилиннэ.
Форум үлэтигэр Саха Өрөспүүбүлүкэтин Баһылыга-Ил Дархана, «Биир ньыгыл Арассыыйа» баартыйа Саха сиринээҕи салаатын салайааччы Айсен Николаев кыттыыны ылла. Кини баартыйа хайысхатынан 5 сыллаах бырагыраама үлэлээбитин түмүгэр хас биирдии улууска, нэһилиэккэ көмө тиийбитин, федеральнай үп кэлиитэ элбээбитин бэлиэтээтэ.
Айсен Николаев быйыл баартыйа тэриллибитэ 25 сылын туолар сылыгар 25 үтүө дьыаланы оҥоруохха диэн ыҥырыытын сэҥээрэ иһиттибит.
Николай Куприянов.