Бүлүү куоратыгар муус устар 1 күнүгэр тэриллибит бэтэрээннэр үгэс буолбут улуустааҕы спартакиадаларыгар хаһааҥҥытааҕар да элбэх кыттааччы, хамаанда күрэхтэстэ. Эдэрдии эрчимнээх аҕам саастаах спортсменнар спартакиадалара быйыл улууска ыытыллар бары тэрээһиннэр курдук Арассыыйаҕа Аҕа дойдуну көмүскээччи, Саха Өрөспүүбүлүкэтигэр Ийэ дойдуну көмүскээччи, Бүлүү улууһугар судаарыстыаннай диэйэтэл Гавриил Иосифович Чиряев, Улуу Кыайыы 80 сылларыгар ананна.
Спартакиада көрүҥнэригэр сытыы, тыҥааһыннаах күрэхтэһиилэр «Эрчим» спорт комплексыгар, сүүрүү манеһыгар, Н.И Протопопова аатынан «Кэскил» оҕо айар-интеллектуальнай киинин дьиэтигэр, «Хомустаах» спортивнай саалатыгар ыытылыннылар.
Спартакиаданы бэтэрээннэр улуустааҕы Сэбиэттэрэ тэрийдэ, улуус дьаһалтатын социальнай уонна эдэр ыччат бэлиитикэтигэр отдела, куорат спорка уонна физическэй култуураҕа управлениета, Василий Румянцев аатынан оҕо спортивнай оскуолата күүс-көмө буоллулар. 300-кэ спортсмен кыттыылаах спартакиада үөрүүлээх арыллыытыгар бэтэрээннэр улуустааҕы Сэбиэттэрин бэрэссэдээтэлэ Федор Николаев, улуус дьаһалтатын социальнай уонна эдэр ыччат бэлиитикэтин отделын салайааччы Елена Федорова, күрэхтэһии кылаабынай судьуйата Александр Корякин кыттааччылары истиҥник эҕэрдэлээтилэр, кыайыыны баҕардылар.
Былырыыҥҥы спартакиада кыайыылааҕа – Чочу нэһилиэгин хамаандата күрэхтэһии кэмигэр көһө сылдьар Кубогы кылаабынай судьуйаҕа туттарда.
Күрэхтэһиилэргэ дьахталлар 55, эр дьоннор 60 саастарыттан кытталлара олохтоммут.
Хабылыкка дьахталларга Чочуттан Марина Николаева кыайда, иккис миэстэни Чинэкэттэн Анна Иванова, үсүһү – Хампаттан Анастасия Боронова ыллылар. Эр дьоннорго Чочуттан Илья Николаев бастаата, иккис Чинэкэттэн Гаврил Иванов, үһүс –Илбэҥэттэн Валерий Кириллин буоллулар.
Хаамыскаҕа дьахталларга Марина Николаева эмиэ бастаата, иккис — Анастасия Боронова, үһүс —Анна Иванова таҕыстылар. Эр дьоннорго Илья Николаев эмиэ кыайда, иккис — Гаврил Иванов, үһүс – Валерий Кириллин.
Дартс көрүҥэр эр дьоннорго хабылык, хаамыска кыайыылааҕа Чочуттан Илья Николаев эмиэ бастаата, иккис миэстэни Тааһаҕартан Александр Прокопьев, үсүһү Чинэкэттэн Александр Корякин ыллылар.
Дьахталларга дротиктары таба бырахпыт Бүлүүттэн Галина Федорова кыайда, иккис миэстэни Чочуттан Альбина Николаева, үсүһү Илбэҥэттэн Анна Иванова ыллылар.
Пневматика саанан ытыыга дьахталларга Илбэҥэ хамаандатыттан Анна Иванова бастаата, Чочуттан Мария Догоюсова иккис, Хаҕынтан Раиса Шадрина үһүс буоллулар.
Эр дьоннорго Чинэкэттэн Александр Корякин бастаата, иккис – спартакиада геройа Чочуттан Илья Николаев, үһүс — Тыымпыттан Иван Константинов.
Тиэннискэ дьахталларга Кыргыдайтан Анастасия Алексеева бастаата, иккис – Бүлүүттэн Светлана Михайлова, үһүс — Хампаттан Анастасия Боронова буоллулар.
Эр дьоннорго Бүлүүттэн Александр Осипов кыайыан кыайда, Балаҕаччыттан Аркадий Колтовской иккис, Кыргыдайтан Федор Николаев үһүс буоллулар.
60 м сүүрүүгэ эр дьоннорго Чинэкэттэн Григорий Борисов бастыҥ бириэмэни көрдөрдө, иккис – Бүлүүттэн Дмитрий Пахомов, үһүс – Дьөккөнтөн Вячеслав Иванов. Дьахталларга Бүлүүттэн Галина Федорова бастаата, иккис – Тааһаҕартан Агафья Суханова, үһүс — Кыргыдайтан Елизавета Терентьева.
Саахымакка дьахталларга Хаҕынтан Тамара Львова тэҥнээҕин булбата, иккис үктэлгэ Бүлүүттэн Юлия Крылатова, үһүскэ – Өкүндүттэн Надежда Кузьмина таҕыстылар.
Эр дьоннорго Балаҕаччыттан Геннадий Григорьев кыайда, иккискэ Бороҕонтон Александр Константинов, үһүскэ Тыымпыттан Иван Никитин таҕыстылар.
Дуобакка дьахталларга Бүлүүттэн Тамара Богарытова бастаата, иккискэ — Хаҕынтан Тамара Николаева, үһүскэ — Чинэкэттэн Ирина Гаврильева.
Эр дьоннорго биллэр дуобатчыттар кыайдылар. Бороҕонтон Андрей Иванов бастаата, иккис миэстэни Бүлүүттэн Николай Николаев, үһүс — Хампаттан Иван Евсеев ыллылар.
Түмүктүүр күрэхтэһиигэ — бальнай үҥкүүлэргэ Чинэкэттэн Клара Иванова уонна Гаврил Иванов бастаатылар, иккис Хампаттан Татьяна Евсеева уонна Николай Потапов, үһүс Тыымпыттан Лира Сивцева уонна Иннокентий Николаев буоллулар.
Спартакиала түмүгүнэн бөдөҥ нэһилиэктэргэ Чочу нэһилиэгэ бастаата, иккис – Чернышевскай, үһүс – Арыылаах нэһилиэктэрэ буоллулар.
Орто нэһилиэктэргэ Баппаҕаайы нэһилиэгэ кыайыылаах таҕыста, иккискэ – I Тоҕус, үһүскэ — Кыргыдай.
Кыра нэһилиэктэргэ Хаҕын хамаандата бастаата, иккис — Бороҕон, үһүс – Өкүндү буоллулар.
Бары көрүҥнэргэ бастыҥ көрдөрүүлээх Чочу нэһилиэгин хамаандата 14 хамаанда иннигэр түһэн иккис сылын субуруччу бэтэрээннэр спартакиадаларын кыайыылааҕынан ааттанна уонна көһө сылдьар Кубогы иккис сылын ылла. Сыдыбылга, Кыадаҥдаҕа дэгиттэр, кыахтаах, мындыр, эдэрдии эрчимнээх аҕам саастаах спортсмен бэтэрээннэр олороллор, дьарыктаналлар, айаллар-туталлар!
Николай Куприянов.