Кэлиҥҥи сылларга Бырабыыталыстыба уонна улуус дьаһалтатын сыллааҕы үлэлэрин отчуоттарыгар Бороҕон, Тыымпы уонна Халбаакы олохтоохторо эргэрбит уот баҕаналарын уларытары, боруобаттар ситимнэрин куттала суох аныгы СИП-кэ саҥардары туруорсаллара, боротокуолга киллэртэрэллэрэ. Быйыл күһүн дьон туруорсуута туолла, олоххо киирдэ.
Бүлүүтээҕи РЭС быйыл улуус бөһүөлэктэригэр уот ситимин саҥардыыга ыыппыт үлэтин тэрилтэ салайааччыта, оройуон Сэбиэтигэр 5 нэһилиэктэн депутат Егор Константинов билиһиннэрэр:
— Быйылгы 2025 сылга Бүлүүтээҕи РЭС хаһаайыстыбаннай ньыманан Бороҕон уонна Тыымпы бөһүөлэктэрин иһинээҕи 0,4 кВ кыамталаах уот ситимин хапытаалынай өрөмүөнүн толору ыытта. Ити бөһүөлэктэргэ уот линиялара таһынан бүрүөһүннээх аныгы — СИП 2 диэн боруобаттарга уларытылыннылар, саҥа тимир-бетон опоралар туруорулуннулар.
Чуолаан, Бороҕоҥҥо 8 км., Тыымпыга 4 км уһуннаах СИП боруобаттаах линиялар тардылыннылар. Тыымпыга саҥа линия бырайыактаан оҥоһулунна, манна 230, Бороҕоҥҥо 106 опора туруорулунна.
Бороҕоҥҥо, Тыымпыга Бүлүүтээҕи РЭС линияҕа үлэлиир электромонтердарын, Хампа учаастагыттан маастар Александр Евсеев, Мукучуттан маастар Прокопий Павлов салалталаах электромонтердар биригээдэлэрэ улахан кээмэйдээх үлэни ыыппыттарын бэлиэтиэм этэ.
Халбаакыга «Эльпромгазстрой» бэдэрээттэһэр тэрилтэ саҥа опоралары туруорда, уот линияларын СИП-кэ уларытта. Халбаакыга барыта 18 км уһуннаах линия уларытылынна.
Ити курдук, быйылгы сылга үс бөһүөлэккэ уот ситимэ толору саҥардылыннылар.
Ааспыт сылларга Бүлүүтээҕи РЭС күүһүнэн Дьөккөн, Бөтүҥ, Өкүндү, Сыдыбыл бөһүөлэктэригэр уот эргэ ситимэ уларытыллыбыта.
Кэлэр 2026 сылга Бүлүүтээҕи РЭС хапытаалынай өрөмүөнүн былааныгар эмиэ 10-ча км уһуннаах СИП линияларын тардыыны көрөбүт. Эһиилги хапыталыынай өрөмүөн үлэтин бырайыагын салалтабытыгар – ЗЭС-кэ, «Якутскэнергоҕа» көмүскүөхпүт.
Бөһүөлэктэргэ урукку линиялар эргэ боруобаттарын аныгы СИП-кэ уларытыы, уот баҕаналарын тимир-бетон опораларга туруоруу – кэлэр сылларга электроэнергиянан туох да саахала суох, бигэтик хааччыйыы мэктиэтэ буолар.
Николай Куприянов.