Бүгүн ыччат библиотекатыгар Амма улууһун баһылыгын социальнай эйгэҕэ солбуйааччы Ньургуйаана Илларионова салайааччылаах «Россия Ийэлэрэ» общественнай түмсүү Саха сиригэр киэҥ биһирэбили ылбыт «Үлэ аргыстаах -эдэр саас», «Бессмертный материнский подвиг» бырайыактарын Бүлүү дьонугар-сэргэтигэр билиһиннэрдэ.
Бу түмсүү Бүлүү бөлөх улуустарынан сылдьан, бүгүн биһиги улууспутугар кэлэн олус истиҥ көрсүһүүнү ыытта. Кэпсэтии бастакы аҥарыгар ыалдьыттар үлэлэрин билиһиннэрдилэр. Бу гражданскай бырайыак Улуу Кыайыы 80 сылыгар уонна анал байыаннай дьайыыга сылдьар уолаттарга ананан үлэлиир диэтилэр. Сэрии кэмигэр күүрээннээхтик үлэлээн, дойдуларын туһугар бэйэлэрин доруобуйаларын, олохторун толук уурбут дьоммут ааттарын үйэтитэр, кэлэр кэнчээри ыччакка тириэрдэр сыаллаах бырайыак буолар диэн бэлиэтээтилэр.
Амма делегацията үлэтин хайысхаларын сиһилии кэпсээтэ, атын улуустар бу бырайыагы өйүөхтэрэ диэн эрэнэллэрин эттилэр.
Кэпсэтиигэ Бүлүү улууһуттан дьахталлар Сэбиэттэрэ, анал байыаннай дьайыыга көмө оҥорор пуун чилиэтттэрэ, туһааннаах тэрилтэлэр үлэһиттэрэ кыттыыны ыллылар. Кинилэр эмиэ бэйэлэрин өттүлэриттэн туох, ханнык үлэни ыыталларын кэпсээтилэр, бэйэлэрин санааларын этиннилэр.
Көрсүһүү уопсай хаартыскаҕа түһүүнэн түмүктэннэ.
Василина Татаринова.