Сэбиэскэй Сойуус Геройа Николай Саввич Степанов төрөөбүт ыам ыйын 13 күнүгэр Бүлүүтээҕи лесничество таһыгар кини аатын сүгэр искибиэргэ өйдөбүнньүк тэрээһин ыытылынна.
Бу күн Сэбиэскэй Сойуус Геройа, хорсун буойун, пулеметчик, арҕаа ньиэмэс фашистарын, илин дьоппуон милитаристарын үлтүрүтүспүт Николай Саввич Степанов төрөөбүтэ 103 сылын бэлиэтээн, Бүлүү куоратын, Балаҕаччы, Хампа искибиэрдэригэр дьон-сэргэ муһунна, кэриэстээн ахтан-санаан аастылар, Герой бүүһүгэр тыыннаах сибэкки уурдулар. Герой төрөөбүт күнүн бэлиэтиир тэрээһиҥҥэ кини аатын сүгэр Бүлүү куорат 3 №-дээх оскуолатын, куорат атын да оскуолаларын үөрэнээччилэрэ, учууталлара, юнармеецтэр кытыннылар.
Герой эйэлээх олоххо Бүлүүтээҕи лесхоз Балаҕаччытааҕы учаастагар өр сылларга эҥкилэ суох леснигынан үлэлээбитин, Саха сиригэр соҕотох лесник-Герой буоларын кэриэстээн, ол саҕана лесхоз дириэктэринэн үлэлээбит Дмитрий Гаврильевич Макаров көҕүлээһининэн, 2005 сыл ыам ыйын 7 күнүгэр Бүлүүтээҕи лесхоз таһыгар искибиэр тутуута түмүктэммитэ, бүүһэ туруоруллубута.
Сыллата Герой төрөөбүт күнүгэр искибиэргэ ыытыллар өйдөбүнньүк тэрээһиҥҥэ Бүлүү дьоно-сэргэтэ көхтөөх кыттыыны ылар, бүүһүгэр тыыннаах сибэкки уурар.
Быйылгы Улуу Кыайыы 80 сылыгар ыытыллыбыт өйдөбүнньүк тэрээһиҥҥэ оройуон Сэбиэтин бэрэссэдээтэлэ Гаврил Корякин, улуус баһылыгын социальнай эйгэҕэ солбуйааччы Александр Комаров, бэтэрээннэр улуустааҕы Сэбиэттэрин бэрэссэдээтэлэ Федор Николаев, Герой уола Юрий Николаевич Степанов, Бүлүү лесничествотын салайааччытын солбуйааччы Захар Андреев, Бүлүү куорат Герой Н.С.Степанов аатынан 3 №-дээх оскуолатын дириэктэрин солбуйааччы Мария Куланова эҕэрдэ тылларыгар Николай Саввич Степанов геройдуу быһыыта, олоҕо холобур буолан көлүөнэттэн көлүөнэҕэ бэриллэ туруоҕун бэлиэтээтилэр.
Герой Н.С.Степанов 3 №-дээх оскуолатын үөрэнээччитэ Сардана Долгунова бэйэлэрэ оҥорор «Азбука вилюйчанина» аныгы сыыппара бырайыактарын туһунан, Герой Н.С.Степанов искибиэригэр турар куар-кодунан суотабай төлөпүөҥҥэ Герой олоҕун билсиэххэ сөбүн кэпсээтэ.
Герой дьиэ кэргэнин аатыттан быйылгы анал истипиэндьийэлэри Герой уола Юрий Николаевич Степанов математика учууталыгар Галина Анисимоваҕа, Бүлүү лесничествотын салайааччытын солбуйааччы Захар Андреев 11 кылаас үөрэнээччититигэр Емельян Константиновка туттардылар.
Бүлүүлэр Герой Николай Саввич Степанов албан аатыгар сүгүрүйэллэр, кининэн киэн тутталлар!
Николай Куприянов.