От ыйын 10 күнүгэр Чочу нэһилиэгэ сурукка киирбитэ 255 сылыгар уонна 100 саастаах Аҕа дойду Улуу сэриитин бэтэрээнэ, норуот хаһаайыстыбатын үтүөлээх үлэһитэ, А.Е.Кулаковскай аатын Судаарыстыбаннай бириэмийэ лауреата, Саха Өрөспүүбүлүкэтин, Дьокуускай куорат, Бүлүү улууһун, Чочу нэһилиэгин Бочуоттаах олохтооҕо, сэбиэскэй кэмҥэ оройуоннааҕы Сэбиэт исполкомун 17 сыл ситиһиилээхтик салайбыт, “Үйэ саас” бэлиэлээх Кирилл Егорович Павловка аналлаах Үрүҥ тунах ыһыах ыһылынна.
Ытык кырдьаҕас Кирилл Егорович кыыһа Анастасия Кирилловналыын, Ил Түмэн депутата Егор Григорьевтыын уо.д.а. кытта Чочу Күбээйитигэр төрөөбүт өтөҕөр тахсан мүөттээх салгынынан тыынан, хонон-өрөөн, балаҕаныгар тиийэн дойдутун ахтылҕанын таһааран киирбитэ.
От ыйын 9 күнүгэр Кирилл Егорович Бүлүү куоратыгар олорор эмиэ 100 саастаах сэрии бэтэрээнин, байыаннай разведчигы, үтүөлээх учууталы Николай Иванович Иванову кытта дьиэтигэр тиийэн көрсүбүтэ. “Үйэ саас” бэлиэлээх ытык кырдьаҕастар бэрт уһуннук олорон уруккун-хойуккуну санатыһан, бүгүҥҥү олоҕу ырытыһан астынан-дуоһуйан тарҕаспыттара.
От ыйын 10 күнүгэр Чочуга сарсыарда тымныы самыыр ортотугар норуодунай бэйиэт Иван Михайлович Гоголев-Кындыл түмэлин иннигэр сэрии бэтэрээнин уола, “Киэргэ” ювелирнай фирма салайааччыта, мас ууһа, 19 омук дойдутугар саха сэргэтин оҥорон туруорбут Александр Павлов аҕатыгар анаан уһаммыт Аар Баҕах сэргэни туруордулар.
Аттыгар эмиэ кини уһаммыт сахаттан соҕотох Потсдам кэмпириэнсийэтигэр, Нюрнберг куоракка фашистар салалталарын сууттааһыҥҥа харабылынан сылдьыбыт Чочуттан төрүттээх Василий Давыдович Ивановка аналлаах Аар Баҕах сэргэстэһэ турар.
Сэргэни туруорууга айыылартан көҥүл ылар алгыс тылынан ураты көстүүлээх Федор Попов—Тоҥус Сөдүөт арчылаата.
Саха Өрөспүүбүлүкэтин бэтэрээннэрин Сэбиэтин бэрэссэдээтэлэ, СӨ Ытык Сүбэтин салайаачытын солбуйааччы, полковник Аркадий Саввинов, бэтэрээннэр оройуоннааҕы Сэбиэттэрин бэрэссэдээтэлэ Федор Николаев кыттыылаах Бүлүү куоратын баһылыга Ян Попов Чочу нэһилиэгин баһылыгар Николай Прокопьевка Саха сирин бэтэрээннэрин Сэбиэтин былааҕын эстафета быһыытынан туттарда.
Ыһыах арыллыытыгар 9 уол, 7 кыыс кынаттардаах тахсыбыт алгысчыт Михаил Томскай сахалыы сиэринэн Үрдүк Айыылар араҥаччылыы, арчылыы сылдьалларыгар көрдөһөн алгыс тылын эттэ. Хотуттан үрэр тыал намыраата, ардах тохтоото.
Түһүлгэҕэ мустубут дьон сүһүөхтэригэр туран нэһилиэк былааҕын сэрии бэтэрээнэ Кирилл Егорович Павлов, нэһилиэк баһылыга Николай Прокопьев, 2026 сыл “Бастыҥ үөрэнээччитэ” Варя Прокопьева көтөҕөллөрүн ытыс тыаһынан көрүстүлэр.
Ытык кырдьаҕас Кирилл Егорович эҕэрдэ тылыгар кэлиҥҥи сылларга улууска, куоракка, төрөөбүт нэһилиэгэр тахсыбыт уларыйыылары хайгыы көрбүтүн, улуус баһылыга Сергей Винокуров ыытар үлэтин бэлиэтээтэ, салгыы оҥорон таһаарыыны элбэтэргэ, саҥа хайысхаларга үлэлииргэ ыҥырда уонна элбэх биир дойдулаахтарыгар – эдэриттэн эмэнигэр тиийэ Махтал суруктары, сэмэй бэлэхтэрин туттарда.
Улуус баһылыга Сергей Винокуров “Үйэ саас” бэлиэлээх ытык кырдьаҕаһы истиҥник эҕэрдэлээтэ, Павловтар дьиэ кэргэннэрэ Саха сиригэр киэҥник биллэллэрин бэлиэтээтэ, улуус аатыттан сэмэй бэлэҕи туттарда.
— Бүлүүлэр ытык киһибит Бүлүү куората 400 сыллаах үбүлүөйүгэр диэри чэгиэн сылдьан кыттаргар ыҥырабыт, — диэн Сергей Винокуров баҕа санаатын эттэ.
Кирилл Егорович Бүлүү улууһун райсоветын саамай уһуннук — 17 сыл салайбыта, кыыһа Анастасия Кирилловна Бүлүү улууһун уустук кэмҥэ салайан, баһылыгынан ситиһиилээхтик үлэлээбитэ, “Киэргэ” ювелирнай фирма салайааччыта Александр Кириллович аата-суола омук сиригэр тиийэ биллэр.
Кирилл Егорович Павлов Бүлүү улууһун оройуоннааҕы Сэбиэтин исполкомун бэрэссэдээтэлинэн үлэлиир кэмигэр Кыһыл Сыыр гааһы, ниэби көрдүүр экспедицияларын кытта ыкса сибээс олохтоммута, куоракка 7,5 км уһуннаах буровой турбалартан сайыҥҥы уу ситимэ тардыллыбыта, таас тутуу саҕаламмыта, сопхуостар сайдыбыттара, уопсай оҥорон таһаарыы биллэ үрдээбитэ.
Ытык кырдьаҕаһы арыаллаан сылдьар Саха Өрөспүүбүлүкэтин бэтэрээннэрин Сэбиэтин бэрэссэдээтэлэ, СӨ Ытык Сүбэтин салайааччытын солбуйааччы, полковник Аркадий Саввинов, бэтэрээннэр оройуоннааҕы Сэбиэттэрин бэрэссэдээтэлэ Федор Николаев, нэһилиэк баһылыга Николай Прокопьев уо.д.а. истиҥник эҕэрдэлээтилэр.
Улуус баһылыга Чочу нэһилиэгэ сурукка киирбитэ 255 сыла бэлиэтэнэринэн нэһилиэк баһылыгар 500 тыһ солк суумалаах харчы сертификатын туттарда.
Бүлүү улууһун баһылыга Сергей Винокуров, Саха Өрөспүүбүлүкэтин бэтэрээннэрин Сэбиэтин бэрэссэдээтэлэ Аркадий Саввинов уонна бэтэрээннэр оройуоннааҕы Сэбиэттэрин бэрэссэдээтэлэ Федор Николаев бииргэ үлэлииргэ туһуланар үс өрүттээх Сөбүлэһиигэ илии баттастылар.
Олохтоох тыйаатыр артыыстара түһүлгэҕэ сэрии бэтэрээнэ Кириил Егорович Павлов олоҕун дьүһүйэр сыанканы туруоран көрдөрдүлэр.
Ыһыах үөрүүлээх арыллыыта Чочу олоҥхоһута, тойуксута, оһуокайдьыта, алгысчыта Михаил Семенович Шадрин уола Валерий Иванов оһуокай таһаарыытынан түмүктэннэ.
100 саастаах сэрии бэтэрээнэ Кирилл Егорович Павлов оһуокайга кытынна, бар дьонун кытта бииргэ оһуохайдаан эргийэ хаамта!
Ытык киһи чэгиэн буол!
Николай Куприянов.