Быйылгы үөрэх дьылыгар «Чуораанчык» уһуйаанҥа «Туску» аҕа сэбиэтэ оҕо кыра сааһыттан өбүгэ үгэһин, тылын уонна култууратын иҥэринэригэр сыал-сорук туруоран этнопедагогическай хайысхалаах үлэтин саҕалаата.
Ол курдук уһуйааммытыгар аҕалар түмсүүлэрин кэҥэтэр, күүһүрдэр мааны күн буолан ааста. Сэбиэт бэрэссэдээтэлэ Егор Рожин түмсүү чилиэннэрин кытта кэлэр кэскилбит, оҕолорбут уонна төрөппүт кэмитиэтин иннигэр өрө көтөҕүллэн туран андаҕар биэрдилэр. Уһуйаан салайааччыта Наталья Корякина бары аҕаларга уонна эһэлэргэ аҕа сэбиэтин кыттыылааҕа буолар туһунан туоһу суругун туттарда.
Иитээччи Анастасия Николаева аҕаларга ыытыллыбыт «Уһуйааҥҥа оҕону этнопедагогика нөҥүө иитиигэ аҕа оруола» анкетаны билиһиннэрдэ. Анкета сүрүн сыала — хас биирдии дьиэ кэргэҥҥэ оҕону иитиигэ аҕа ордук туохха сыһыаннааҕын, интэриэстээҕин, сахалыы сиэргэ-туомҥа сыһыаннары быһаарыы. Бу анкета түмүгэ аҕа сэбиэтин үлэтигэр тускулун оҥорорго туттуллуо.
Салгыы оҕо өйүн, толкуйун сайыннарар «Сонор» хамсаныылаах оонньууну аҕаларга билиһиннэрэн, хамаандаларга арааран бэрт сэргэх күрэхтэһии ыытылынна. Бу оонньуу дьиэҕэ оонньонор араас көрүҥнэрин аҕалар олус сэнээрдилэр, сэргээтилэр.
Күрэхтэһии түмүгүнэн мунутуур кыайыылааҕынан «Тииҥчээн» улахан бөлөх аҕалара, 1 миэстэни — «Күнчээн» кыра бөлөх, 2 миэстэни — «Сулусчаан» бэлэмнэнии бөлөх, 3 миэстэни «Кустук» орто бөлөх аҕалара ыллылар.
«Дьиэ кэргэн үгэһэ — биһиги аҕабытынан» хаартысканан улахан быыстапка тэрилиннэ. Манна хас биирдии оҕо аҕатын кытта дьарыктарын, айылҕаҕа сынньалаҥнарын сиһилии көрдөрбүттэр.
Ити курдук бырааһынньыктыы киэргэммит кырачаан иитиллээчилэр эҕэрдэ ырыаларынан-үҥкүүлэлэринэн аргыстанан, хамсаныылаах оонньуу күрэхтээх Аҕа күнэ биһиги уһуйааммытыгар сэргэтик ааста.
Наталья Корякина.