Кулун тутар 4-6 күннэригэр Бүлүү улууhун делегат дьахталлара киэҥ далааhыннаах, дириҥ ис хоhоонноох, Саха АССР үлэhит дьахталларын 100 сыллаах съеhин чэрчитинэн ыытыллыбыт тэрээhиннэргэ көхтөөхтүк кыттан, уопут атастаhан кэллибит, араас семинардарга, конференцияларга, форумҥа кытынныбыт.
Мин кулун тутар 5 күнүгэр Ил Түмэҥҥэ парламентарий дьахталлар кулууптарын Саха сирин дьахталларын бастакы сийиэстэригэр, Улуу Кыайыы 80 сылыгар анаммыт мунньаҕар Бүлүү улууhун дьахталларын Сэбиэтин аатыттан кыттыыны ыллым.
Тэрээhини Ил Түмэн парламентарий дьахталларын кулуубун бэрэссэдээтэлэ Антонина Григорьева 100 сыллааҕыта Саха сиригэр үлэhит дьахталлар бастакы сийиэстэригэр 86 дэлэгээт дьахтар кыттыбытын, ол саҕана дьахтар туох да бырааба суоҕун, делегаттар дьахтар быраабын, үөрэхтэнэрин ситиспиттэрин туhунан, олоххо көхтөөх лидер дьахталлар уопсастыба, олох сайдарыгар оруолларын ыйан туран киирии тылы эттэ. Мунньахха бастакы сийиэс кыттылааҕа Мария Яковлева – Овчинникова сиэнэ , СӨ үтүөлээх учуутала Елена Иванцова эҕэрдэтин видео-сибээс нөҥүө ыыппытын, А.Е. Кулаковскай — Өксөкүлээх Өлөксөй хос сиэнэ, дэлэгээт Варвара Кулаковская сиэн балта, социальнай сулууспа туйгуна Варвара Сизых уонна П. Ойуунускай ийэтэ, бастакы сийиэс дэлэгээтэ Евдокия Слепцова хос сиэнэ, Ойуунускай сиэнэ, учуонай, СӨ үөрэҕириитин туйгуна Мария Соловьева эҕэрдэлэрин сэҥээрэн иһиттибит.
Мунньахха дьокутааттар Елена Голомарева Арктикаҕа ураты болҕомто ууруллуохтааҕын, дьахталлар уопсастыбаннай түмсүүлэрэ хотугу улуустарга аhы-үөлү тириэрдиигэ оруолларын, Алена Атласова оҕо төрөөhүнүн элбэтиигэ, элбэх оҕолоох дьиэ кэргэни өйүүр бырагыраамалары билиhиннэрдилэр.
Ил Түмэн доруобуйа харыстабылыгар бастайааннай кэмитиэтин бэрэссэдээтэлэ Светлана Давыдова дьахтар доруобуйата кэлиҥҥи кэмҥэ биллэ мөлтөөбүтүн бэлиэтээтэ. Төрүүргэ – ууhуурга дьахтар доуобуйатын эрэ буолбакка, эр киhи доруобуйатыгар болҕомто эмиэ ууруллуохтаах диэн эттэ.
Социологическай наука доктора Ульяна Винокурова 100 сыл тухары сийиэс туруорсубут соруктара төhө туолбутун, кэлэр 100 сылга чопчу сыаллар-соруктар ылыллан дьахтар уопсастыбаннай тэрээhиннэрэ өссө күүскэ үлэлиэхтээхтэрин бэлиэтээтэ.
Салгыы кэпсэтии СВО –ҕа сылдьар байыастарга, кинилэр дьиэ кэргэттэригэр көмө, инбэлиит оҕолору кытта үлэ, тыа хаhаайыстыбатын, дьиэ кэргэҥҥэ күүс өттүнэн өттөйүүнү хайдах намтатар бопуруостар тула кэпсэтии сыттытык турда.
Бу мунньах дьахтар уопсастыбаннай тэрээhиннэрэ уопсастыба сайдарыгар, тупсарыгар төһүү күүс буолалларын туоhулуур, түмсүүлэри түмэр улахан тэрээhин буолла.
Мария Прокопьева, Бүлүү улууhун дьахталларын Сэбиэтин бэрэссэдээтэлэ.