Кулун тутар 4-6 күннэригэр Дьокуускай куоракка үлэһит дьахталлар Бүтүн Саха сиринээҕи бастакы сийиэстэрин 100 сылыгар аналлаах үөрүүлээх тэрээһин үрдүк таһымнаахтык буолан ааста.
Бүлүү улууһуттан уопсастыбаннай үлэҕэ куруутун инники күөҥҥэ сылдьар дьахталлартан 11 делегат кытынна.
Форум сыала-соруга: саха дьахталларын үлэлэрэ өрөспүүбүлүкэ сайдыытыгар туһата, уруккуга, биллиҥҥигэ, инникигэ. Бу форумҥа 1925 с. кулун тутар 7 күнүгэр ыытыллыбыт дьахталлар маҥнайгы сийиэстэрин туһунан архыып үлэһиттэрэ хаартыскалары, боротокуоллары көрдөрдүлэр, сырдаттылар. Г.М. Степанов, Н.Н.
Дегтярев, А.Н. Атласова, Е.А. Волкова, Т.Ю. Павлова, И.В. Юргин уонна да атыттар тыл эттилэр. Биһиги өрөспүүбүлүкэбитигэр оҕо төрөөһүнэ үрдээбитин, дьахталлар, кинилэр дьиэ кэргэттэрэ судаарыстыбаттан туох көмөнү ылыахтарын сөбүн кэпсээтилэр.
Салгыы түөрт дискуссионнай былаһааккалар үлэлээтилэр, маастар- кылаастар ыытылыннылар. «Тепло рук трудящихся женщин Якутии» диэн аһымал аахсыйаҕа кыттан, харысхаллаах сыттыктары анал байыаннай дьайыыга сылдьар буойуннарга тигэн биэрдибит. СВО-ҕа сылдьар байыастарга, кинилэр дьиэ кэргэттэригэр көмө, инбэлиит оҕолору кытары үлэ, тыа хаһаайыстыбатын, дьиэ кэргэҥҥэ күүс өттүнэн өттөйүүнү хайдах намтатар боппуруостар тула кэпсэтии сытыытык барда.
Маҥнайгы күннэригэр дьахталлар уопсастыбаннай доруобуйа уонна медицинскэй сэрэтии өрөспүүбүлүкэтээҕи киинигэр доруобуйаларын туругун
көрдөрдүлэр. Итини сэргэ форум кыттыылаахтара Ил Түмэҥҥэ көрсүһүүгэ сырыттылар. Салгыы «Трансформация гражданской политической и социальной роли женщин в прошлом и будущем» диэн научнай-практическай конференцияҕа кытынныбыт.
Үс күннээх форум түмүгүнэн бэйэм санаабын эттэхпинэ, дьахтар, ийэ киһи дьиэ кэргэниттэн саҕалаан бүтүн өрөспүүбүлүкэ, дойду сайдыытыгар улахан кылаатын киллэрэр. Бэрт сэргэх интэриэһинэй тэрээһиҥҥэ сылдьан, көрөн-истэн, уопут ылан, элбэҕи билэн, кыттыбыт дьон бары биһирээтибит.
Түгэнинэн туһанан, улууспут дьаһалтатыгар, Клара Валерьяновнаҕа, Елена Николаевнаҕа, биһиги делегациябытын баай-мааны гына киэргэппит, Саха сирин норуотун маастарыгар Сусанна Прокопьевнаҕа уонна биһигини куруутун өйүүр Елена Яковлевнаҕа улахан махталбытын тириэрдэбит.
Мария Томская,
Бүлүү куоратын бочуоттаах олохтооҕо, Бүлүү улууһун уопсастыбаннай түмсүүлэрин уонна СВО-ҕа көмө оҥорор пуун салайааччыта.