Бүгүн, муус устар 2 күнүгэр, Бүлүү улууһугар үлэлиир Саха Өрөспүүбүлүкэтин Бырабыыталыстыбатын Бэрэссэдээтэлин солбуйааччы Георгий Степанов саҥа балыыһа комплексыгар, «Эһигинниин бииргэ» байыаннай дьайыы кыттыылаахтарыгар көмөнү оҥорор пууҥҥа сырытта.
Кини, бастатан туран, «Доруобуйа» национальнай бырайыагынан тутуллар Бүлүү балыыһатын иккис дьиэтигэр сырытта. Үлэҕэ киириэхтээх эбийиэккэ Георгий Степановы оройуоннааҕы балыыһа кылаабынай бырааһа, Ил Түмэн депутата Егор Григорьев, улуус баһылыгын бырамыысаланнаска, инфраструктураҕа солбуйааччы Эдуард Эверстов, өрөспүүбүлүкэтээҕи Биир кэлим сакаасчыт сулууспатын управлениетын салайааччы Никифор Саввинов уо.д.а. арыаллаан сырыттылар.
Егор Григорьев бырабыыталыстыба бэрэссэдээтэлин солбуйааччыга сотору кэминэн үлэҕэ киириэхтээх балыыһа иһин, ол иһигэр, туруоруута, таҥыыта түмүктэнэн эрэр МРТ аппараты, турар хоһун көрдөрдө, бүгүҥҥү күҥҥэ туруоруллубут мэдиссиинэ тэриллэрин кэпсээтэ. Георгий Михайлович саҥа балыыһа иккис дьиэтигэр атын улуустарга суох доруобуйаны чөлүгэр түһэрии отделениета арыллан үлэлиэхтээҕин ордук интэриэһиргээтэ.
Георгий Степанов үлэлии турар балыыһа бастакы дьиэтигэр сылдьан, мэдиссиинэ үрдүк технологиятын туһанан уустук эпэрээссийэлэри оҥорор хирургия отделениетын үлэтин билистэ, хирурдары кытта кэпсэттэ.
Сырыы түмүгүнэн Георгий Степанов бэлиэтээбитинэн, балыыһа иккис дьиэтин тутар-таҥар үлэтэ сүрүннээн түмүктэммит, технологическай оборудованиенан хааччыллыы эрэ хаалбыт.
Биир кэлим сакаасчыт сулууспатын управлениетын салайааччы Никифор Саввинов быһаарбытынан, бүгүҥҥү күҥҥэ балыыһаны технологическай оборудованиенан хаччыйыы 60 бырыһыана ситиһиллибит. Итиннэ элбэх суумалаах МРТ аппарата элбэх бырыһыаны ылбыта чуолкай.
Балыыһаны тутар «Кинг-95» тутар тэрилтэ бэйэтин суотугар МРТ аппараты атыылаһан аҕалан туруорбут. Өрөспүүбүлүкэ бүгүҥҥэ күҥҥэ балыыһа иккис дьиэтин тутуутун национальнай бырайыагар кыттыһан, технологическай оборудованиены атыылаһарга 140 мөл. солк. суумалаах үбүлээһини оҥоро илигэ балыыһа үлэҕэ кэмигэр киириэхтээҕин уһатан биэрдэ.
Бэҕэһээ балыыһа комплексын иккис дьиэтигэр сылдьыбыт өрөспүүбүлүкэ борокуруора Сергей Дябкин, улуус борокуруора Марк Федоров ити боппуруоһу болҕомтоҕо ылбыттарын санатыахха сөп.
Николай Куприянов,
ааптар уонна Иннокентий Колесов фотолара.