Алтынньы 3 күнүгэр Казань куоракка муай-тайга (тайскай боксаҕа) Татарстан чемпионатыгар уонна бастыыр иһин күрэхтэһиитигэр Халбаакыттан төрүттээх Аман Иванов 60 киилэҕэ 16-17 саастаах уолаттарга бастаан, чемпион үрдүк аатын ылбыт. Ону таһынан «Лучший боец ринга» анал аакка тиксибит.
Аман Халбаакыга үөрэнэр кэмигэр тренерэ Артур Васильев элбэххэ үөрэтэн, дьарыктаан кэлбит. Оттон билигин Аман Казань куоракка Поволжскайдааҕы физическэй культура, спорт уонна туризм государственнай университетын 1 куурсугар үөрэнэ сылдьар. Онно «Барс Казань» диэн бойцовскай кулуупка дьарыктанар, тренерэ — Артур Ильясов.
Аман Иванову үрдүк ситиһиитинэн эҕэрдэлиибит уонна инникитин да элбэх кыайыылар-хотуулар баар буоллуннар диэн баҕа санаабытын тиэрдэбит.
Василина Татаринова.