Кулун тутар 14 күнүгэр судаарыстыбаннай, бэлитиичэскэй диэйэтэл Исидор Барахов дойдутугар — Үөһээ Бүлүү Харбалааҕар элбэх тэрээһиннээх Бүлүү куорат күнэ ыытылынна, бииргэ үлэлииргэ Сөбүлэһии түһэрилиннэ.
Ааспыт ый ортото Харбалаахха икки мэндиэмэннээх, таас тутуулаах Исидор Барахов аатынан саҥа, баараҕай култуура киинэ үөрүүлээх арыллыытыгар кыттыыны ылбыт Бүлүү улууһун баһылыга Сергей Винокуров икки судаарыстыбаннай диэйэтэллэр – Степан Аржаков уонна Исидор Барахов ааттарын үйэтитиигэ бииргэ үлэлииргэ Бүлүү куорат күнүн ыытыахха диэн этиитэ үөһээ бүлүүлэр сэҥээриилэрин ылбыта.
Ити этии олоххо киирэн, Харбалаахха судаарыстыбаннай диэйэтэл Степан Аржаков дойдута — Бүлүү куорат күнэ бэрт сэргэхтик ааста.
Бүлүү куорат күнүн үөрүүлээх арыллыытыгар, судаарыстыбаннай, бэлитиичэскэй диэйэтэл Исидор Барахов мэҥэ тааһыгар тэриллибит миитиҥҥэ Харбалаах нэһилиэгин баһылыга Константин Платонов, Бүлүү куорат мэрэ Ян Попов, Ил Түмэн депутата Федот Филиппов, Бүлүү улууһун баһылыгын социальнай боппуруостарга солбуйааччы Александр Комаров, Исидор Бараховка аналлаах Саха Өрөспүүбүлүкэтин Судаарыстыбаннаһын түмэлин дириэктэрэ Светлана Копыленко саха автономиятын төрүттэспит Исидор Барахов уонна Степан Аржаков олохторо, үлэлэрэ, ситиһиилэрэ быстыспат ситимнээҕин бэлиэтээбиттэрэ.
Исидор Барахов аатынан култуура киинин бастакы мэндиэмэнин киэҥ-куоҥ саалалара Исидор Бараховка аналлаах Саха Өрөспүүбүлүкэтин Судаарыстыбаннаһын түмэлигэр бэрилибит. Бүлүү куоратыгар М.Н.Жирков аатынан култуура дыбарыаһыгар Бүлүүттэн төрүттээх судаарыстыбаннай диэйэтэллэргэ аналлаах түмэл холобур буолбут диэх курдук санаа киирэр. Исидор Бараховка аналлаах түмэл таһыма үрдүк, үбүлэниитэ өрөспүүбүлүкэттэн, туспа үлэһиттэрдээх. Бүлүү куоратыгар баар түмэли Саха Өрөспүүбүлүкэтин Судаарыстыбаннаһын түмэлэ буоларыгар туруорсуохха баара.
Түмэлгэ Исидор Барахов автономияны бииргэ туруулаһан үлэлэспит доҕотторугар биир хос анаммыт. Кини ыкса доҕоругар Степан Аржаковка аналлаах бэртээхэй экспозиция туруоруллубутун Харбалаахха Бүлүү куорат күнүгэр кэлбит ыалдьыттар сиһилии билистилэр.
Култуура киинигэр үлэлиир бибилэтиэкэ саалатыгар Харбалаах дьаһалтатын эппиэттээх үлэһиттэрэ, депутаттара, Ытык кырдьаҕастарын Сүбэтин, Бүлүү улууһун дэлэгээссийэтин кыттыылаахтара Төгүрүк остуолга бииргэ үлэлииргэ саха автономиятын турууласпыт Степан Аржаков уонна Исидор Барахов ааттарын үйэтитиигэ саҥа сүүрээннэри киллэриигэ, бииргэ үлэлэһии кэскиллээх былааннарыгар санааларын атастастылар.
Бүлүүттэн улуус, куорат дьаһалтарын эппиэттээх үлэһиттэрэ, куорат Сэбиэтин депутаттара, Чочу нэһилиэгин баһылыга Петр Догоюсов, култуура тэрилтэлэрин салайааччылара, үлэһиттэрэ уо.д.а. кытыннылар.
Бу күн Степан Аржаков уонна Исидор Барахов доҕордоһууларын үйэтитиигэ эдэр ыччат төгүрүк остуола, «Саха автономиятын төрүттээччилэр сыдьааннарыбыт» диэн квиз-оонньуу ыытыыннылар.
Киэһэ саха чулуу уолаттара Исидор Барахов уонна Степан Аржаков автономияны төрүттэһиигэ бииргэ ыыппыт суолталаах үлэлэрин, доҕордуу ситимнэрин үйэтитиигэ аналлаах Үөһээ Бүлүү Харбалааҕар ыытыллыбыт Бүлүү куорат күнүн чэрчитинэн Исидор Барахов аатынан Култуура киинигэр Бүлүү куорат баһылыга Ян Попов уонна Харбалаах нэһилиэгин баһылыга Константин Платонов култуура, үөрэҕирии, эдэр ыччаты иитии, туризмы, спорду сайыннарыы хайысхаларыгар бииргэ үлэлииргэ Сөбүлэһии түһэристилэр.
Бу күн Исидор Барахов аатынан Култуура киинигэр Бүлүү куорат күнүн чэрчитинэн улуус тыатын хаһаайыстыбатын кэпэрэтииптэрэ атыы-эргиэн дьаарбаҥкатын тэрийбиттэрин, олохтоохтор, чугас нэһилиэктэртэн дьон кэлэн хото атыыласпыттарын бэлиэтиэххэ сөп.
Исидор Барахов аатынан Култуура киинин арыллыытыгар Ил Дархан Айсен Николаев саха автономиятын төрүттэспит Былатыан Ойуунускай, Максим Аммосов, Исидор Барахов уонна Степан Аржаков турар уруһуй хартыыналарын бэлэхтээбитэ. Хартыынаҕа автономияны төрүттээччилэр ахсааннарыгар Степан Аржаков киллэриллибитэ биир дойдулаахпыт үлэтин билинии буолар.
Түмэл дириэктэриттэн Светлана Копыленкоттан «Хартыынаны ханна көрүөххэ сөбүй?» диэн ыйытыкка, кини «Көрдөрүүгэ туруора иликпит, харалла сытар» диэн хоруйдаабыта. Элбэх киһи саҥа хартыынаны көрүөхтэрин баҕарбыттарын эрэ ахтыахха сөп…
Автономияны төрүттээччилэр ахсааннарыгар Степан Аржаков аата бигэтик киирбитэ улуус баһылыга Сергей Винокуров салалтатынан улуус уопсастыбаннаһа, култуура эйгэтин үлэһиттэрэ Степан Аржаков аатын тилиннэриигэ, үйэтитиигэ, кини саха автономиятын төрүттэниитигэр киллэрбит кылаатын историческай чахчыларга олоҕуран билиһиннэриигэ ыыппыт элбэх сыллаах үлэлэрин түмүгэ буолар.
Салгыы хардыынан Бүлүүгэ Саха Өрөспүүбүлүкэтин судаарыстыбаннаһын түмэлэ тэриллэрин кэтэһэбит. Эрэнэбит.
Николай Куприянов.