Бүгүн, тохсунньу 22 күнүгэр, күн бастакы аҥарыгар улуус баһылыгын бастакы солбуйааччы Иван Евсеев салайааччылаах улуус дьаһалтатын ааспыт сыллааҕы үлэтин түмүктэрин отчуотун туруорар иккис бөлөх улуус уһук хоту өттүгэр тэйиччи сытар II Күүлэт нэһилиэгин 30-ча олохтоохторун кытта көрүстэ.
Отчуокка Иван Евсеев улууска ааспыт сылга ыытыллыбыт үлэ сүрүн түгэннэрин кылгастык билиһиннэрбитин олохтоохтор болҕойон иһиттилэр.
Көрсүһүүгэ олохтоохтор тыа хаһаайыстыбатыгар сыһыаннаах элбэх ыйытыктарыгар Иван Евсеев быйылгытттан субсидия үбүн улуус быһаарар буолбутунан сиһилии быһаарыылары биэрдэ. Кини болҕомто үүтү тутууга көрүллүөҕүн, ол эрэн, сүөһү төбөтүгэр көрүллэр үбүлээһин субсидия эмиэ баар буолуоҕун билиһиннэрдэ.
Итини тэҥэ, олохтоохтор кыһыҥҥы суолу оҥорууну туруорустулар. Соторутааҕыта Ньурба урбаанньыта аукциоҥҥа кыайан, муниципальнай суолталаах суоллары көрүүнү ылбыт эрээри, билиҥҥитэ Күүлэт түөлбэтин суоллара анньыллыбакка тураллар.
Олохтоохтор II Күүлэккэ гаас ситимин тиэрдиини күүскэ туруорустулар.
Оройуоннааҕы балыыһа кылаабынай бырааһа, Ил Түмэн депутата Егор Григорьев амбулаторияҕа олунньу ый саҥатыгар лаборатория оборудованиета кэлиэҕин иһитиннэрдэ. Оччоҕуна олохтоохтор анаалыстарын Бүлүүгэ киирэн туттарбакка, ырааппакка дойдуларыгар туттарар кыахтаныахтара!
Атын нэһилиэктэргэ суотабай сибээһи тупсарары күүскэ туруорсар буоллахтарына, II Күүлэт олохтоохторо ахтыбатылар даҕаны. Ол биллэр. Былырыын улууска соҕотох манна эрэ 5 суотабай эпэрээтэр үлэтин саҕалаан, олохтоохтор түргэн Интернетинэн үөрэ-көтө туһаналлар, Бүлүү киэнинээҕэр түргэн диэн киэн тутта кэпсииллэр.
Отчуокка оройуон Сэбиэтин бэрэссэдээтэлэ Гаврил Корякин кыттыыны ылла.
Николай Куприянов.