Аан дойдутааҕы доруобуйа күнүгэр, ол эбэтэр муус устар 7 күнүгэр М.Н. Жирков аатынан култуура Дыбарыаһыгар оҕолорго анаммыт «Күн мичээрдэрэ» диэн үһүс төгүлүн ыытыллар улуустааҕы инклюзивнай фестиваль буолан ааста. Тэрээһин сүрүн соруга — доҕордоһуу истиҥ түһүлгэтин тэрийэн, хас биирдии оҕо бэйэтин талаанын арыйарыгар, сайдарыгар күүс-көмө буолуу. Ону тэҥэ доруобуйаларыгар хааччахтаах оҕолору Бүлүү улууһун талааннаах эдэр ыччатын кытта хамаандаларга холбоон, барыларыгар сөптөөх эйгэни тэрийии буолар.
Тэрээһини С.М. Аржаков аатынан Бүлүүтээҕи дьиэ кэргэҥҥэ иитиини өйүүр киин, «Эрэл» инбэлиит оҕолоох төрөппүттэр уопсастыбалара, култуура уонна норуот айымньытын киинэ, Н.Г. Чернышевскай аатынан Бүлүүтээҕи педагогическай колледж уонна Бүлүү улууһун дьаһалтата бииргэ ыыттылар.
Бырайыак салайааччыта, С.М. Аржаков аатынан дьиэ кэргэҥҥэ иитиини өйүүр Бүлүүтээҕи киин сэбиэдиссэйэ Мария Даниловна Егорова бэлиэтииринэн, бу үлэ сыл аайы кэҥээн иһэр: «Бастаан Бүлүүтээҕи педагогическай коллеһы кытары холбоон, устудьуоннар уонна оҕолор кыттыылаах инклюзивнай кэнсиэрт ыыппыппыт. Ол кэннэ оҕолор айар үлэҕэ наадыйалларын көрөн, 2023 сылтан саҕалаан, инклюзивнай фестиваль оҥорбуппут. Билигин улуустар кыттыһаннар, маастар-кылаастары ыытан, оҕолор талааннарын сайыннарар туһугар үлэлиибит».
Ол курдук фестиваль бастакы түһүмэҕэр маастар-кылаастар (гиипсэ, уруһуй, пластилин, иистэнии, үҥкүү, ырыа) ыытылыннылар. Иккис түһүмэххэ оҕолор ырыа-тойук, үҥкүү-битии көрдөрүүлэринэн күрэхтэстилэр.
Күрэх чэрчитинэн, эдэркээн саастарыттан саҕалаан дьоҕурдарын арыйар, уопсайа 30 нүөмэр көрөөччүлэр уонна дьүүллүүр сүбэ болҕомтотугар таҕыста. Оҕолор вокал, хореография, музыкальнай инструменнарга оонньооһун, уус-уран ааҕыы уонна театральнай искусство диэн хас да хайысханан бэйэлэрин дьоҕурдарын көрдөрдүлэр.
Тэрээһин аһыллыытыгар Бүлүү улууһун дьаһалтатын социальнай уонна ыччат политикатын отделын начальнига Елена Николаевна Федорова, С.М. Аржаков аатынан киин дириэктэрин солбуйааччы Юрий Иванович Тутукаров уонна фестиваль сүрүн спонсора, Бүлүү улууһун киин балыыһатын кылаабынай бырааһа, Ил Түмэн депутата Егор Анатольевич Григорьев эҕэрдэ тыл эттилэр. Ону таһынан, социальнай партнердарга — Зоя Егоровна Чорохоеваҕа, Алена Александровна Дашевскаяҕа уонна култуура Дыбарыас үлэһиттэригэр махтал суруктар туттарылыннылар.
Фестиваль түмүгүн таһаарыыга дьүүллүүр сүбэ үлэлээтэ. Кинилэр ортолоругар: Саха Өрөспүүбүлүкэтин култууратын үтүөлээх үлэһитэ Надежда Николаевна Иванова, С.М. Аржаков аатынан дьиэ кэргэҥҥэ иитиини өйүүр Бүлүүтээҕи киин дириэктэрин солбуйааччы Юрий Иванович Тутукаров, улуустааҕы үөрэҕирии салалтатын сүрүн исписэлииһэ Фекла Викторовна Иванова, Бүлүү улууһугар нэһилиэнньэ социальнай көмүскэлигэр уонна үлэҕэ салалтатын сэбиэдиссэйэ Афанасий Михайлович Слепцов уонна Н.Г. Чернышевскай аатынан Бүлүүтээҕи педагогическай колледж преподавателэ Наталья Гаврильевна Федотова бааллар.
Күрэх түмүгүнэн кыайыылаахтарынан буолбут оҕолору уонна коллективтары эҕэрдэлиибит:
Вокал:
- 1 миэстэ — Н.С. Степанов аатынан Бүлүүтээҕи 3 №-дээх орто оскуола 3 «Б» кылааһын коллектива;
- 2 миэстэ — Бүлүүтээҕи 1 №-дээх начальнай оскуола 3 кылааһын «Победа» ансаамбыла;
- 3 миэстэ — И.М. Гоголев аатынан Чочу орто оскуолатын үөрэнээччитэ Михайлова София.
Хореография:
- 1 миэстэ — Эрэл уонна Эркин Мараказовтар;
- 2 миэстэ — Н.С. Степанов аатынан Бүлүүтээҕи 3 №-дээх орто оскуола коллектива;
- 3 миэстэ — Аризова Вика уонна Семенов Данил (С.М. Аржаков аатынан киин).
Музыкальнай инструменнарга толоруу:
- 1 миэстэ — Воронов Аман (М.Н. Жирков аатынан Бүлүүтээҕи оҕо искусствотын оскуолата);
- 2 миэстэ — Васильев Сарыал (М.Н. Жирков аатынан Бүлүүтээҕи оҕо искусствотын оскуолата);
- 3 миэстэ — Алексеев Эрсан (Н.И. Протопопова аатынан «Кэскил» интеллектуальнай-айар киин).
Уус-уран ааҕыы:
- 1 миэстэ — Ботуев Иван («Ытанньах герой буолбат»);
- 2 миэстэ — Семенов Данил («Детство»).
Театральнай искусство:
- 1 миэстэ — Бүлүүтээҕи 1 №-дээх начальнай оскуола коллектива;
- 2 миэстэ — Бүлүүтээҕи 1 №-дээх оскуола «Кэрэли» театр-мода.
Кыайыылаахтарга барҕа махталбытын тиэрдэбит уонна инникитин өссө үрдүк ситиһиилэри баҕарабыт. Оҕолорбут талааннара, дьулуурдара үйэ-саас тухары кэскиллээх буоллун.
Кюннэй Куланова, Мария Петрова.