Бүлүү к. олохтооҕо, өр сылларга хаһыакка суруйбут Николай Никифоров дьиэ кэргэнинэн улуус хаһыатын кытта быстыспат сибээстээхтэр диэххэ сөп. Кини “Хаһыат – мин олохпор” рубрикаҕа биир бастакынан бэйэтин ахтыытын ыыппыта.
Ол курдук кини олоҕун аргыһа Людмила Николаевна Новосибирскайдааҕы полиграфическай училищены бүтэрэн, 1978-1981 сылларга Бүлүүтээҕи типографияҕа печатнигынан үлэлээбитэ. Оччолорго нэдиэлэҕэ иккилиитэ, ол аата түөртэ тахсыбыт “Октябрь суола”, “Путь Октября” диэн оройуон хаһыаттарын тохтоло суох бэчээттээбит дьонтон биирдэстэринэн Людмила Николаевна Никифорова буолар. Кини бүгүн биһиги кэпсэтиибитигэр кыттыыны ылар:
— Нууччалыы уонна сахалыы тылларынан тахсыбыт икки хаһыаты ааҕааччыларга кэмигэр тириэрдэр, төһө да тус-туһунан тэрилтэлэр буолбуттарын иһин, редакция уонна типография биир сыаллаах-соруктаах үлэлииллэрэ, бэйэ-бэйэлэрин ситэрсэн биэрэр этилэр, — диэн үлэ бэтэрээнэ Людмила Николаевна ахтыытын саҕалыыр.
– Хаһыат редактора – Илья Иннокентьевич Николаев, типография дириэктэрэ Ольга Петровна Стручкова Амматтан ананан биһиэхэ кэлэн үлэлээбитэ. Ол сылларга икки тэрилтэ үлэһитэ да элбэҕэ, өссө партийнай, профсоюзнай, комсомольскай тэрилтэлэрэ эмиэ бииргэ этилэр. Онон тустаах үлэбит таһынан уопсастыбаннай үлэ “күөстүү оргуйара”, онтон ким да туора турбат этэ.
Оччолорго үлэлээбит ньымабыт “высокай” бэчээт диэн ааттанара. Биһиги үлэбит үксүн киэһэ хойут саҕаланара. Бэчээттиир массыынабыт тохтоло суох үлэлээн, олус элбэх тираһынан тахсыбыт хаһыаттарбытын сыа-сым курдук бэчээттээн, сарсыарда эрдэ почтаҕа хойутааһына суох тиэрдиллэрин хааччыйар этибит.
Мин, төһө да кылгас кэмҥэ үлэлээтэрбин, Бүлүүтээҕи типографияҕа дьиҥнээх буһуу-хатыы оскуолатын ааспытым диэн билигин олус күндүтүк саныыбын. Ол курдук А.П. Анисимова, В.С. Сергеева, Л.Г. Титова, Н.В. Борисова, Е.Н. Данилова, В.Н. Иванова, П.В. Гуляева, Ю.П. Чиряев курдук чулуу полиграфистартан үлэҕэ, олоххо элбэххэ үөрэммитим, үлэни сөптөөхтүк сыаналыырбар төһүү күүс буолбуттара, сүбэ-ама биэрэллэрэ да олус үчүгэй этэ.
Итиннэ үлэлии сылдьан редакция суруналыыстарын, атын да үлэһиттэрин кытта чугастык алтыспытым, элбэх кэрэ-бэлиэ түгэннэри, күүрээннээх субуотунньуктары, бырааһынньыктар үөрүүлээх тэрээһиннэрин билигин да умнубаппын. Комсомольскай тэрилтэ сэкэритээрэ буоламмын сытыы бөрүөлээх суруналыыс Матрена Никитична Дорофееваны кытта ыкса алтыһан үлэлээбиппинэн киэн туттабын.
Билигин бочуоттаах сынньалаҥҥа олорон, хаһан эрэ өрдөөҕүтэ бэйэм илиибинэн тутан-хабан бэчээттээбит “Олох суола” хаһыатым кэлэрин олус күүтэбин уонна хаһыаппын ахтыбычча, саҕаланыаҕыттан бүтүөр диэри барытын ааҕарбын сөбүлүүбүн. Хаһыаппыт аныгы олох тэтимин кытта бииргэ хардыылаан, хайы-үйэ 95 сыл устата ааҕааччыларыгар сонунун тириэрдэ турарын олус сөҕө-махтайа саныыбын”, — диэн Людмила Николаевна бэйэтин ахтыытын түмүктээтэ.
Муза Федорова.