«Олох суола» редакция социальнай ситимнэрин ханаалларыгар кэнники кэмнэргэ Бүлүү куоратыгар килиэп сыаната төһө да үрдээбитин үрдүнэн хаачыстыбата тупсубатаҕын: доруоһата элбэҕин, аһыы буоларын, бытарыйа сылдьарын туһунан ааҕааччылар хом санааларын этинэллэр.
Хаһыат, редакция социальнай ситимнэрин күндү сурутааччыларын санааларын толорон, Бүлүү куорат бэкээринэтин сэбиэдиссэйэ Ольга Афанасьеваттан килиэп астааһынын, хаачыстыбатын тупсарыы туһунан ыйыталастыбыт.
— Килиэп бурдуктан быһаччы тутулуктааҕа биллэр. Кэлиҥҥи сылларга бурдукпут хаачыстыбата мөлтөөн иһэр диэххэ сөп. Билигин үрдүкү суортаах «Беляевскай» бурдугунан килиэп астыыбыт.
Иккиһинэн, урут тиэстэни аа-дьуо таһаарар килиэп бэйэтин доруоһата баара, кэлин суох буолла. Билигин килиэп астыырга түргэнник таһаарар доруоһаны туттабыт, ол иһин, сороҕор килиэп бытарыйа сылдьар буолар.
Килиэппитин тупсараары тиэстэтин араас ньыманан мэһийтэрэ сатыыбыт. Билиҥҥи ирдэниллэр технологияны тутуһан астыыбыт. Буулка, багет уонна да атын бурдук аспыт хаачыстыбата үчүгэй, ити килиэпкэ сороҕор итинник тахсар. Килиэп астааһына барыларыттан уустук, хаачыстыбатын тупсарыыга күннэтэ үлэлиибит, — диэн Ольга Афанасьева билиһиннэрдэ.
Хаһыат, редакция социальнай ситимнэрин күндү сурутааччылара күннээҕи кыһалҕалар тустарынан этинэн, биллэрэн иһиҥ!
Николай Куприянов.