От ыйын 22 күнүгэр Саха Өрөспүүбүлүкэтин култууратын уонна духуобунай сайдыытын миниистирэ Афанасий Ноев Бүлүү улууһугар үлэлээтэ.
Кини Бүлүү улууһугар сырыытыгар култуура эбийиэктэрин үлэлэрин билистэ. Хампаҕа, Тааһаҕарга норуот айымньытын кииннэригэр, улуустааҕы бибилэтиэкэҕэ сырытта, култуура үлэһиттэрин кытта көрүстэ, Бүлүү куоратыгар тутуллуохтаах Судаарыстыбаннас мусуойуон кэнсиэпсийэтин билистэ.
Афанасий Ноевка Судаарыстыбаннас мусуойуон кэнсиэпсийэтин улуус баһылыгын социальнай боппуруостарга солбуйааччы Александр Комаров, Бүлүү куорат баһылыга Ян Попов, култуура сайдыытын уонна норуот айымньытын оройуоннаааҕы киинин салайааччыта Алена Дашевская, култуура үтүөлээх үлэһитэ Надежда Иванова билиһиннэрдилэр. Миниистир кэнсиэпсийэни дьүүллэһии кэмигэр туох үлэ ыытыллыахтааҕын чуолкайдаата.
Миниистир “Дьиэ кэргэн” национальнай бырайыак үбүнэн Иван Гоголев-Кындыл аатынан улуустааҕы кииннэммит бибилэтиэкэ дьиэтигэр ыытыллар өрөмүөн үлэтин билистэ. Бибилэтиэкэ дириэктэрэ, Бүлүү куоратын депутаттарын Сэбиэтин бэрэссэдээтэлэ Николай Харлампьев култуура миниистиригэр икки томнаах библиографическай ыйынньыгы бэлэхтээтэ.
Министир култуура үлэһиттэрин кытта көрсүһүүтүгэр Култуура сылыгар ыытыллар сүрүн үлэни, соруктары кытта билиһиннэрдэ, Бүлүү улууһугар култуура эйгэтигэр таһымнаах үлэ ыытылларын бэлиэтээтэ.
Иннокентий Колесов, Самаана Дмитриева фотолара,
“Олох суола”.