Биһиги үөрэхпит кыһатыгар Улуу Кыайыы 75 сылын көрсө дьаабылакалаах саад олордуллубута. Манна мастар Бүлүү педучилищетын 40-60 сылларга бүтэрбит выпускниктарга анаммыттара. Кинилэр бары үөрэммит кыһаларын үлэлэринэн, олохторунан суон сураҕырпыт, үрдүккэ көтүппүт, өрөспүүбүлүкэ сайдыытыгар дьоһун кылааттарын киллэрсибит, үтүө холобур буолаллар, дьон-сэргэ махталын ылар ытык дьон. Бу анал мастары аймахтара, сиэн оҕолоро, «Хорсун» патриотическай кулууп устудьуоннара олордубуттара. Хас биирдии мас суруктаах-бичиктээх, кэлэр-барар дьон ааҕан, сонурҕаан, сэргээн ааһаллар. Саадпытын өссө кэҥэтэр былаан баар.
Кырдьаҕас үөрэх кыһатыгар үйэттэн ордук кэмҥэ учуутал, уһуйааччы идэтин ылбыт бастыҥ выпускниктар элбэхтэрэ биллэр. Бастакы өйдөбүнньүк мастардаах чулууттан чулуу ытык дьоммут ортолоругар бааллар.
Быйыл бэс ыйын 3 күнүгэр өрөгөйдөөх, үйэлээх үбүлүөйүн көрсүбүт, 100 сааһын туолбут, өрөспүүбүлүкэ, Бүлүү улууһун бочуоттаах олохтооҕо, сэрии кыттыылааҕа, элбэх орден кавалера, Саха АССР норуотун хаһаайыстыбатын үтүөлээх үлэһитэ, Өксөкүлээх Өлөксөй аатынан государственнай бириэмийэ лауреата, училище 1946 с. выпускнига Кирилл Егорович Павлов маһа саамай көстүүлээх инники миэстэҕэ силигилии турар. Кэккэлэһэ үүнэн ахан улааталлар өрөспүүбүлүкэ норуодунай учуутала Николай Иванович Афанасьев, 1943 с. выпускник, өрөспүүбүлүкэ сайдыытыгар ураты кылааттарын киллэрсибит салайааччылар Климент Егорович Иванов, 1951 с. выпускник, Климент Кириллович Корякин, 1957 с. выпускник, өрөспүүбүлүкэ бочуоттаах олохтоохторо Нина Иннокентьевна Протопопова, 1946 с. выпускник, Варвара Андреевна Петрова, 1957 с. выпускник, Үөһээ Бүлүү ытык олохтооҕо Ульяна Терентьевна Тимофеева, 1950 с. выпускник уонна биллиилээх этнопедагог Константин Спиридонович Чиряев о.д.а. мастара. Маҥнайгынан Бүлүү бөлөх улуустарга 2-3 мас анаммыта, саадпыт өссө эбиллэн кэҥээн иһэрэ буоллар.
Ол күннэргэ арай Светлана Григорьевнаҕа Москубаттан звонок кэлбит: ”Мастары үүннэрэн, олордон эрэр эбиккит үһү, биһиэхэ бааллар дуо?,- диэн «Бэс Чагда» санаторийга сынньана сылдьар, училищены 1952 с. бүтэрбит успуорт легендата Николай Николаевич Волков уонна Үөһээ Бүлүүттэн тиийэ сылдьар педагогическай үлэ бэтэрээнэ Михаил Семенович Борисов эрийэн ирдэспиттэр, чуолкайдаспыттар. Сонун саҕалааһын туһунан Михаил Семенович балта, Үөһээ Бүлүүттэн үөрэх управлениетын каадырга исписэлииһэ Калиста Васильевна Борисова кэпсээбит эбит.
«Аан дойдуну атыйахтыы аймаабыт уодаһыннаах сэрии алдьархайа сүрэххэ оспот баас буолан, олорон хааллаҕа. Төһөнөн элбэх бириэмэ аастар, Улуу Кыайыы сүдү суолтата сүппэт, сөҕүрүйбэт. Эйэлээх олоҕу эргиппит аҕа көлүөнэ умнууга хаалбатын туһугар уонна үөрэхпит кыһатын үлэлэринэн, олохторунан киэҥ дуолга аатырдыбыт үөрэнээччилэргитигэр, учууталларгытыгар анаан, кинилэр албан ааттарын үйэтитэргэ мэҥэ өйдөбүнньүктэри үксэтэргит дьоһуннаах дьыала»,-диэн суруйар Кирилл Егорович колледж дириэктэрэ С.В.Ивановка.
Европа саадтарыгар дьаабылака мастарын маанылаах хатыҥар ханыылыы көрөн, саха саллаата дойдутугар ахтылҕанын аһарынаардаҕа дии санааттан олордуллубут дьаабылака мастарбыт сылын ахсын Кыайыы күнүн көрсө ситэн силигилиэхтэрэ, сибэккилэниэхтэрэ, онтон салгыы астанан да туруохтарыгар баҕарабыт.
Саргылана Осипова,
куратор,
Елена Данилова,
устудьуон, 282 группа.