Ааспыт өрөбүлгэ Саха Өрөспүүбүлүкэтин норуотун маастара, биллэр иистэнньэҥ Анна Семенова В.О.Каратаев аатынан Олоҥхо дьиэтигэр саха таҥаһын тигиигэ: кытыылаах сон нэмиэтин иистэниигэ маастар-кылааһы биэрдэ.
Бүлүү далбар хотуннара маастар-кылааска иистэнэр тэриллээх кэлэн иис-уус кэрэ абылаҥар уһуйулуннулар, элбэҕи биллилэр-көрдүлэр, норуот маастара тикпит таҥастарын быыстапкатын сэргии көрдүлэр.
— Анна Николаевна быйыл Ил Дархан бириэмийэтин ылбыт биллэр норуот маастара буолар. Кини тикпит оҥоһуктарынан Арасыыйа, аан дойду таһымнаах элбэх быыстапкаларга кыттан үрдүк сыанабылы ылбыта.
Быйыл күһүн Бүлүү куоратыгар бэйэтин тиэргэнигэр иистэнэригэр саха балаҕанын туттарда.
Биһиги маастардарбыт өбүгэлэрин үгэһин бар дьоҥҥо тириэрдээри утуму салгылларыттан үөрэбит, саха култуурата сайдыытыгар бэйэлэрин кылааттарын киллэрэллэринэн киэҥ туттабыт, — диэн билиһиннэрдэ В.О.Каратаев аатынан олоҥхо норуодунай кэлэктиибин салайааччы, Саха Өрөспүүбүлүкэтин култууратын туйгуна Светлана Иванова.
Быйыл Бүлүү куоратыгар тэриллибит улуус ыһыаҕар Анна Семенова Уустар түһүлгэлэригэр Емельян Ярославскай аатынан кыраайы үөрэтэр түмэлгэ турар 19 үйэтээҕи сону үтүктэн 3 сыл тикпит бууктаах сонун быыстапкаҕа туруорбутун дьон-сэргэ улаханнык сэҥээрбитэ.
Олоҥхо декадатыгар көхтөөх кыттыыны ылбыт норуот маастара Анна Семеноваҕа саха норуотун үгэстэрин сөргүтүүгэ ыытар дьоһуннаах үлэтигэр ситиһиилэри баҕарыаҕыҥ!
Николай Куприянов.