Ахсынньы 17 күнүгэр Ньурба куорат драматическай театрын киэҥ уораҕайыгар “Кыайыыга бииргэ” диэн Бүлүү бөлөх улуустарын анал байыаннай дьайыы кыттыылаахтарыгар уонна кинилэр дьиэ кэргэттэригэр көмө оҥорор волонтердарга аналлаах региональнай форум буолан ааста. Форумҥа Мирнэй, Ньурба, Үөһээ Бүлүү, Бүлүү волонтердара кыттыыны ыллыбыт. Бүлүү улууһуттан баһылыгы социальнай политикаҕа солбуйааччы Александр Игоревич Комаров салайааччылаах 13 волонтер кыттыыны ылан кэллибит.
Форум сарсыарда 10 чаастан регистрациянан саҕаланна. Анал байыаннай дьайыы кыттыылаахтарыгар уонна кинилэр дьиэ кэргэттэригэр “Бүлүү улууһа эһигинниин бииргэ” диэн мобилизация саҕаланаатын тэриллибит улуустааҕы көмө оҥорор пуун волонтердара, общественнай түмсүүлэрэ тикпит 18 араас көстүүмнэрбитин, таҥастарбытын, түөрт араас ньыманан өрбүт харыстанар сиэккэлэрбитин, сиргэ сытарга аналлаах 2 сантиметр халыҥнаах иһигэр пенофол угуллубут икки араас ковригы уонна да атын уолаттарга биэрэн ыытар уопсайа 96 араас малы-салы быыстапкаҕа туруоран көрдөрдүбүт.
Салгыы театр үрдүк сыанатыгар форум үөрүүлээх арыллыыта буолла. Манна презентация көрдөрөн үлэбитин сиһилии кэпсээтим. Биһиги улууспутуттан Екатерина Алексеева Ил Түмэн Бочуотунай Грамотатынан, Мария Томская СӨ Ыччакка уонна социальнай коммуникацияҕа министиэристибэтин Бочуотунай Грамотатынан, Валентина Кононова Ф.К. Попов аатынан “Сердце патриота” диэн бочуоттаах анал Бэлиэнэн, Валентина Захарова, Татьяна Петрова, Валентина Григорьева, Федосия Мандарова форум тэрийэр комитетын Махтал суругунан наҕараадаланнылар.
СӨ Ыччакка уонна социальнай коммуникацияҕа министрэ Петр Шамаев “Бүлүү улууһа эһигинниин бииргэ” диэн анал байыаннай дьайыы кыттыылаахтарыгар уонна кинилэр дьиэ кэргэттэригэр улуустааҕы көмө оҥорор пуун волонтердарыгар, махтанан туран өйдөбүнньүк мэтээли дохсун ытыс тыаһынан туттарда.
Форумтан киһи элбэҕи билэр, көрөр, онон маннык форумнар өссө да буола турдуннар диэн баҕа санаабытын этэбит.
Биһигини өйөөн, массыына биэрэн, форумҥа кыттарбытыгар күүс-көмө буолбутугар улуус баһылыгын социальнай политикаҕа солбуйааччы Александр Игоревич Комаровка махталбытын тиэрдэбит.
Мария Томская, “Бүлүү улууһа эһигинниин бииргэ” диэн СВО-ҕа улуустааҕы көмө оҥорор пуун салайааччыта, Бүлүү куоратын Бочуоттаах олохтооҕо.