Ахсынньы 22 күнүгэр Чочу нэһилиэгэр «Сүдү киһиэхэ сүгүрүйэбит …» диэн Чочу нэһилиэгин уонна Бүлүү улууһун Бочуоттаах олохтооҕо, Саха АССР искусствотын үтүөлээх диэйэтэлэ, Сергей Зверев-Кыыл Уолун үөрэнээччитэ, Саха Өрөспүүбүлүкэтин култууратын үтүөлээх үлэһитэ, алгысчыт, тойуксут, олоҥхоһут, оһуокайдьыт, норуот ырыаһыта Семен Иннокентьевич Иванов — Чочу Сэмэнэ төрөөбүтэ 91 сылыгар аналлаах тэрээһин буолан ааста.
Тэрээһин кини пааматынньыгар сибэкки дьөрбөтүн уурууттан саҕаланна. Салгыы култуура киинигэр В.О Каратаев аатын сүгэр олоҥхоһуттар норуодунай кэлэктииптэрэ, «Сэмэн Уйбаныап ыччаттара», С.И.Иванов аатынан Чочутааҕы норуот тыйаатырын түмсүүлэрэ Семен Иннокентьевич Иванов «Куула хара тыаны кутуругунан булкуйа оонньуур кылааннаах Өргөстөөх Киис Бэргэн» олоҥхотун үс көлүөнэ олоҥхону толорооччулар кыттыылаах толордулар.
Тэрээһин кэмигэр ахсынньы ый саҥатыгар олоҥхоһут С. И.Иванов «Киис Бэргэн» олоҥхотунан Санкт — Петербург куоракка Аан дойдутааҕы «Искусство планетата» бэстибээл 1 Үрдэл кубогын ылбыт В.О. Каратаев аатын сүгэр олоҥхоһуттар уонна тойуксуттар норуодунай кэлэктииптэрэ уонна «АйЛаана» үҥкүү бөлөҕүн кыттыылаах испэктээк толорууларын видеоҕа устууну көрүү буолла.
Хас биирдии киһи сүдү убайбытын Семен Иванов кэрэ мөссүөнүн, кылыһахтаах куоластаах тойугун, сэгэлдьитэн көтөн эрэр курдук туттан оһуокай үҥкүүтүн … ахтан-санаан аастыбыт. Музей үлэһиттэрэ кини кэтэ сылдьыбыт таҥастарын, кыайыы лиэнтэлэрин, грамоталарын, хаартыскаларын туоһу гынан быыстапкаҕа туруордулар. Олохтоох дьаһалта баһылыга Николай Прокопьев, култуура үтүөлээх үлэһитэ Августина Евсеева, култуура туйгуннара Светлана Иванова, Сэмэн Мэҥкэр уо.д.а. сүдү киһиэхэ сүгүрүйэн бииргэ үлэлээбиттэрин, алтыспыттарын, кини култуураҕа кылаатын ахтан-санаан аастылар.
Светлана Иванова.