Ааспыт нэдиэлэҕэ Бүлүү улууһун WhatsApp бөлөхтөрүгэр «Сыа Бүлүү» астыыр-үөллүүр кэпэрэтиип маҕаһыыннарыгар атыыланар сүөгэй (сметана) хаачыстыбата биллэ мөлтөөбүтүн туһунан, атыыга арыы көстүбэт буолбутун элбэхтик суруйдулар, санааларын үллэһиннилэр.
Сүөгэй амтана уларыйбытын, атыыга тахсар арыы аҕыйаабытын «Сыа Бүлүү» кэпэрэтиип дириэктэрэ Алексей Кондратьев бу курдук быһаарда:
— Үүттэн оҥоһуллар үрүҥ аһы нэһилиэнньэ кэлиҥҥи сылларга хамаҕатык атыылаһар буолбута бэлиэтэнэр, хаачыстыбатын кэтииллэр. Үүт «Ампаардаах» хаһаайыстыбаттан киирбитин курдук киирэ турар.
Тыа хаһаайыстыбатын министиэристибэтэ биһиэхэ быйылгы сылга бороһуок үүтүнэн үрүҥ аһы оҥорорго субсидия көрбүтэ. Ол иһин, ахсынньы саҕаланыытыттан бороһуок үүттэн сүөгэй оҥоруутун саҕалаабыппыт. Сүөгэй бары ирдэбили тутуһуллан оҥоһуллар, этикеткатын атын өҥнөөх оҥорбуппут, үүт бороһуогуттан оҥоһулунна диэн суруктаах.
Бу нэдиэлэттэн саҕалаан үүттэн оҥоһуллар сүөгэй атыыга тахсыаҕа. Саҥа дьыл иннигэр үүт ас куруутун кырыымчык буолар, атыыга таҕыста да туруорбаттар, атыылаһан иһэллэр.
Биһиги маҕаһыыннарбытыгар арыы атыыга аҕыйаабытын «Агро-Мастаах» соҕотуопкалыыр тэрилтэ тэриллибитинэн быһаарыахха сөп. «Агро-Мастаах» кэпэрэтиипкэ киирбит элбэх арыыны оҥорор Хаҕын, Кыргыдай, Балаҕаччы урут бородууксуйаларын биһиэхэ туттарар этилэр, билигин бэйэлэрэ батараллар.
Биһиэхэ арыы баар да аҕыйах, бастакы уочарат, дуогабардаах тэрилтэлэрбитин: оҕо уһуйааннарын, оскуолалары уо.д.а. хааччыйабыт.
Даҕатан эттэххэ, аҕыйах сыллааҕыта «Сыа Бүлүү» кэпэрэтиип 4,2 тыһ. т үүтү соҕотуопкалыырын, билигин 2,8 тыһ.т үүтү тутарын санатыахха сөп.
Николай Куприянов.