Ыам ыйын 22-23 күннэригэр Бүлүүгэ үөрэммит училищебытыгар үөрэхпитин бүтэрбиппит 50 сылын чиэһигэр «Бүтэһик чуорааҥҥа» кытынныбыт. Колледж салалтата биһигини олус истиҥник көрүстэ. Бары тэрээһиннэр үрдүк таһымнаахтык аастылар.
Сарсыарда 7 чаастан Учууталларбыт аллеяларыгар долгутуулаах мүнүүтэлэр аастылар. Биһигини үөрэппит хас биирдии талааннаах учууталларбыт мөссүөннэрэ харахпытыгар көһүннүлэр, кинилэр кэрэ, сырдык мөссүөннэрэ биһиги сүрэхпитигэр өрүү тыыннаахтар…. Хас биирдиилэрин кытта көрсүбүт, кэпсэппит курдук сананныбыт. Саныырбыт, ахтарбыт бэлиэтин барыларыгар тыыннаах сибэкки дьөрбөтүн ууран, хаарыаннарбытын санаан- ахтан долгуйан олордубут…
«Көмүс уруокка» учууталларбытын, бииргэ үөрэммиттэрбитин көрсөн, устудьуоннары кытта кэпсэтэн, ахтыһан, ыллаан, хоһоон ааҕан 2 чаас ааспытын билбэккэ хааллыбыт. Оннук истиҥ дьоро үтүө күн тосхойдо. Бэтэрээн учууталларбыт барахсаттар Мария Ивановна Абрамова, Валентина Кузьминична Кириллина, Евгений Романович Алексеев, Ирина Дидимовна Слепцова кэлэн көрсөн үөрүүбүтүн өссө үрдэттилэр. Көмүс мүнүүтэлэргэ 50 сыллаах выпусктар, билигин бэйэлэрэ ыччакка кэрэтик ахтыллар дьоһуннаах, ааттаах- суоллаах учууталлар А.С.Еремеева-Габышева, Н.А.Климовская, Е.М.Иванова, В.В.Егорова о.д.а. устудьуоннарга кэскиллээх санааларын уус-уран тылынан эттилэр, эдэрдэргэ алгыс анаатылар, үөрэммит кыһабыт бэйэбитин салайынарга, тулуурдаах, эппиэтинэстээх буоларга ииппитэ, араас дьоҕурбутун сайыннарбыта, сырдыкка, кэрэҕэ кынаттаабыта диэн тоһоҕолоон бэлиэтээтилэр, оҕону коллективка, дьиэ кэргэҥҥэ үлэнэн иитиигэ, төрөөбүт тылы, үтүө үгэстэри үөрэтиигэ болҕойорго о.д.а. элбэх, дириҥ санааларын тиэртилэр.
Үөрэх бастыҥнарыгар, активнай выпускниктарга анал бириэмийэлэрбитин туттарыыбыт чааһа куорат култууратын саҥа дыбарыаһыгар олус үөрүүлээх, тэрээһиннээх буолла. Оҕолор кэрэлэрэ, таҥастара-саптара, талааннара, үөрэххэ, спорка, самодеятельность көрүүлэригэр Россия таһымыгар тиийэ ситиһиилэрэ сөхтөрдө. Бүлүү улууһун дьаһалтата, колледж биллиилээх выпускниктарын үөрэнээччилэрин, аймахтарын баһаам элбэх номинациялара дохсун ытыс тыаһынан туттарылыннылар. Выпускниктар айымньылаах аартыктарыгар үтүө алгыс, эҕэрдэ истиҥ тыллара этилиннилэр.
Куораппыт, колледж музейдарыгар автобуһунан тиэллэн арыалынан сырыттыбыт. Бүтэһигэр училищебытыгар учууталларбытын кытта олорон эбиэттээн, колледж эдэр салайааччыларын тылларын- өстөрүн истэн өссө кынаттанныбыт, училищебыт историятын кэпсиир дьоһуннаах саҥа кинигэни бэлэх тутан үөрүүбүт үрдээтэ. Инникитин даҕаны көрсөр, көмөлөсүһэр санаабыт кэҥээтэ, дириҥээтэ.
Колледжка сайдыыга, үөрэҕи, араас идэни баһылааһыҥҥа саҥаны көрдөөһүн, патриотическай хамсааһыннарга кыттыыга ис сүрэхтэн кыһаллыы, түмсүү баара хас хардыы аайы харахха быраҕыллар. Эдэр педколлектив кыаҕа, инникигэ былаана киэҥ, далааһыннаах.
Истиҥ көрсүһүүлэр, өйдөһүү, бииргэ түмсэн үлэлээһин өссө салҕана турдун! Колледж материальнай базата хаҥыы турдун. Аны кэлэрбитигэр сана киэҥ-куоҥ спорт саалата дьэндэйэн турарын көрбүт киһи…
«Бүтэһик чуораан» тэрээһин программатыгар дьоһуннаахтык киллэрэн биһиэхэ истиҥ көрсүһүүлэри бэлэхтээбит колледж салайааччыларыгар, педагогика музейын үлэһиттэригэр дириҥ махталбытын тиэрдэбит. СИТИҺИИНИ, ТҮМСҮҮНҮ, ЭЙЭНИ!!!
Вера Нанова.